ឆ្មាំល្បាតឆ្នេរកោះតៃវ៉ាន់ បានលើកឡើងជាថ្មីនៅថ្ងៃចន្ទ (១៩ ឧសភា) នេះថា ប្រទេសចិន អាចព្យាយាមដាក់សម្ពាធលើកោះនេះ ដោយការធ្វើសមយុទ្ធនៅមុនថ្ងៃគម្រប់ខួបកាន់តំណែងមួយឆ្នាំរបស់មេដឹកនាំកោះ លោក Lai Ching-te នៅសប្តាហ៍នេះ បន្ទាប់ពីរូបភាពមួយលេចឡើងលើប្រព័ន្ធផ្សព្វផ្សាយសង្គមដែលបង្ហាញពីមនុស្សម្នាក់កំពុងដោតទង់ជាតិចិន នៅលើឆ្នេរកោះតៃវ៉ាន់។

ប្រទេសចិន បានហៅលោក Lai ដែលនឹងធ្វើពិធីកាន់តំណែង ១ឆ្នាំនៅថ្ងៃអង្គារ ២០ ឧសភា ស្អែកនេះ ថាជា "ជនផ្ដាច់ខ្លួន"។ កាលពីសប្តាហ៍មុន អាជ្ញាធរកោះបាននិយាយថា ទីក្រុងប៉េកាំង អាចធ្វើសមយុទ្ធយោធាបន្ថែមទៀតដើម្បី "បង្កបញ្ហា" ជុំវិញខួបគម្រប់ខួបនេះ។

កោះតៃវ៉ាន់ នៅតែប្រកាន់នូវគំនិតបែបនេះ បន្ទាប់ពីកាលពីថ្ងៃអាទិត្យ រូបភាពដែលបង្ហោះលើប្រព័ន្ធផ្សព្វផ្សាយសង្គមចិន បានបង្ហាញពីបុរសម្នាក់ដែលហាក់ដូចជាជិះទូកឆ្លងកាត់ច្រកសមុទ្រតៃវ៉ាន់ រួចចូលចតនៅលើឆ្នេរដាច់ស្រយាលមួយ ហើយដោតទង់ជាតិចិន មុនពេលត្រឡប់ទៅផ្នែកប្រទេសចិនវិញ។ ក្រោយមក វីដេអូនេះត្រូវលុបចោល។

នៅពេលត្រូវសាកសួរពីឧបទ្ទវហេតុនេះ លោក Hsieh Ching-chin អនុប្រធានឆ្មាំល្បាតឆ្នេរកោះតៃវ៉ាន់ និយាយថា ចិន ឆ្លៀតឱកាសដើម្បីអនុវត្តសមយុទ្ធ និងប្រើប្រាស់យុទ្ធសាស្ត្រដាក់សម្ពាធផ្សេងទៀត។

កាលពីខែមុន ចិនបានធ្វើហ្គេមសង្រ្គាម ដែលដាក់ឈ្មោះថា "រន្ទះច្រកសមុទ្រ-២០២៥A" នៅជុំវិញកោះតៃវ៉ាន់ ដែលអក្សរ "A" នៅចុងបញ្ចប់នៃឈ្មោះនេះបង្ហាញថា អាចនៅមានច្រើនទៀត។ ចិនបានហៅសមយុទ្ធខែឧសភា ឆ្នាំ២០២៤ របស់ខ្លួនថា "ដាវរួម - ២០២៤A" ហើយក្រោយមកនៅខែតុលា នៃឆ្នាំដដែលនោះ ក៏បានធ្វើសមយុទ្ធ "ដាវរួម - ២០២៤B" មួយផ្សេងទៀត៕