ក្រសួងបង្រួបបង្រួមរបស់កូរ៉េខាងត្បូង បាននិយាយកាលពីថ្ងៃចន្ទថា ប្រទេសកូរ៉េខាងជើង បានដក«ពាក្យបង្រួបបង្រួម» ចេញពីឈ្មោះអគារមួយនៅក្នុងភូមិបទឈប់បាញ់ Panmunjom នៅខាងកូរ៉េខាងជើង    ខណៈដែលទីក្រុងព្យុងយ៉ាង បានបង្កើនយុទ្ធនាការរបស់ខ្លួន ដើម្បីកំណត់ឡើងវិញនូវទំនាក់ទំនងជាមួយទីក្រុងសេអ៊ូលថា ជាអរិភាព។

អ្នកនាំពាក្យក្រសួងបង្រួបបង្រួមលោក Koo Byoung-sam បាននិយាយថា កាលពីខែសីហា ឆ្នាំមុន ប្រទេសកូរ៉េខាងជើង បានជំនួសផ្លាកសញ្ញានៅលើអគាររបស់ខ្លួន នៅក្នុងភូមិ Panmunjom នៅខាងកូរ៉េខាងជើង ដែលស្ថិតនៅកណ្តាលតំបន់គ្មានយោធា (DMZ) ដោយប្តូរឈ្មោះវាថា «Panmun Hall» បន្ទាប់ពីបានដកចេញនូវផ្លាកសញ្ញាពីមុន ដែលសរសេរថា «Unification Pavilion» នៅក្នុងខែមករា។ 

មន្ត្រីរូបនេះ បាននិយាយថា ចំណាត់ការនេះ ហាក់ដូចជាផ្នែកមួយនៃយុទ្ធនាការ ដែលកំពុងបន្តរបស់ទីក្រុងព្យុងយ៉ាង ដើម្បីកំណត់ទំនាក់ទំនងរបស់ខ្លួនជាមួយទីក្រុងសេអ៊ូលថា ជាអរិភាព និងដើម្បីលុបបំបាត់ការបង្រួបបង្រួមអន្តរកូរ៉េចេញ ពីគោលនយោបាយរបស់ខ្លួន។

នៅឆ្នាំ ២០២៣ មេដឹកនាំកូរ៉េខាងជើងលោក គីម ជុងអ៊ុន បានចេញបញ្ជាដោយចាត់ទុកកូរ៉េខាងត្បូង ជាសត្រូវចម្បងរបស់ខ្លួន ហើយចាប់តាំងពីពេលនោះមក បានបង្កើនអរិភាពចំពោះទីក្រុងសេអ៊ូល។

ចាប់តាំងពីខែមេសា ឆ្នាំមុនមក កូរ៉េខាងជើង បានដំឡើងរចនាសម្ព័ន្ធប្រឆាំងរថក្រោះ និងគ្រាប់មីន នៅតាមបណ្តោយតំបន់គ្មានយោធា ហើយបានបំផ្ទុះផ្លូវ និងផ្លូវដែកដែលតភ្ជាប់រវាងភាគីទាំងពីរ ស្របតាមការបញ្ជារបស់លោក គីម ជុងអ៊ុន។