ក្រុមហ៊ួទីនៅប្រទេសយេម៉ែន បានប្រកាសកាលពីថ្ងៃអាទិត្យថា ខ្លួននឹងធ្វើប្រតិបត្តិការយោធាប្រឆាំងនឹងអាកាសយានដ្ឋាន Ben Gurion និងអាកាសយានដ្ឋានអ៊ីស្រាអែល ដែលមិនបានបញ្ជាក់ផ្សេងទៀត ក្នុង    រយៈពេលប៉ុន្មានម៉ោងខាងមុខនេះ ដើម្បីជាការឆ្លើយតបទៅនឹងការកើនឡើងនៃការវាយប្រហាររបស់អ៊ី  ស្រាអែល នៅក្នុងតំបន់ហ្កាហ្សា និងការវាយប្រហារនាពេលថ្មីៗនេះ លើប្រទេសនេះ។

ក្នុងសេចក្តីថ្លែងការណ៍មួយនៅលើវេទិកាប្រព័ន្ធផ្សព្វផ្សាយសង្គម X ការប្រកាសនេះ ត្រូវបានធ្វើឡើងដោយលោក Nasruddin Amer អនុប្រធានអាជ្ញាធរប្រព័ន្ធផ្សព្វផ្សាយរបស់ក្រុមហ៊ួទី។ 

លោក Amer បានជំរុញឲ្យក្រុមហ៊ុនអាកាសចរណ៍ទាំងអស់ដែលកំពុងប្រតិបត្តិការនៅអាកាសយានដ្ឋានអ៊ីស្រាអែល ចាកចេញជាបន្ទាន់ ហើយបានព្រមានអ្នកដំណើរទាំងអស់ឲ្យជម្លៀសខ្លួនចេញ មុនពេលប្រតិបត្តិការរបស់ក្រុមហ៊ួទី ដែលបានគ្រោងទុក។

កាលពីព្រឹកថ្ងៃអាទិត្យ យោធាអ៊ីស្រាអែល បាននិយាយថា ខ្លួនបានស្ទាក់ចាប់មីស៊ីលដែលបាញ់ចេញពីប្រទេសយេម៉ែន ឆ្ពោះទៅកាន់ភាគកណ្តាលអ៊ីស្រាអែល ជាកន្លែងដែលសំឡេងស៊ីរ៉ែនវាយប្រហារតាមអាកាស ត្រូវបានបន្លឺឡើង ដោយជំរុញឲ្យអ្នកស្រុកស្វែងរកជម្រកសុវត្ដិភាព ពេញមួយយប់។

ការកើនឡើងភាពតានតឹងបង្កឡើងដោយក្រុមហ៊ួទី កើតឡើង បន្ទាប់ពីកិច្ចព្រមព្រៀងបទឈប់បាញ់សម្របសម្រួលដោយប្រទេសអូម៉ង់ រវាងកងជីវពលដែលមានមូលដ្ឋាននៅយេម៉ែន និងសហរដ្ឋអាមេរិក ដែលមានគោលបំណងបញ្ចប់ការវាយប្រហារគ្នាទៅវិញទៅមក។ ទោះជាយ៉ាងណាក៏ដោយ កិច្ចព្រមព្រៀងនេះ មិនពង្រីកដល់គោលដៅរបស់អ៊ីស្រាអែល ឬការដឹកជញ្ជូនដែលមានទំនាក់ទំនងមួយអ៊ីស្រា        អែលនោះទេ។