ទីភ្នាក់ងារព័ត៌មានរដ្ឋ SANA បានរាយការណ៍ដោយលើកប្រភពសន្តិសុខថា មនុស្សយ៉ាងហោច ៣នាក់ ត្រូវបានសម្លាប់នៅក្នុងការផ្ទុះគ្រាប់ក្នុងរថយន្ត មានគោលដៅលើប៉ុស្តិ៍នគរបាលមួយកន្លែង ស្ថិតក្នុងទីក្រុងភាគខាងកើត Al-Mayadeen ប្រទេសស៊ីរី ។

សេចក្តីរាយការណ៍និយាយថា ការផ្ទុះគ្រាប់នៅតំបន់ជនបទ Deir az Zor កាលពីថ្ងៃអាទិត្យ បណ្តាលឲ្យមនុស្សជាច្រើននាក់ រងរបួសផងដែរ ។

រូបភាពវីដេអូឃ្លីបត្រូវបានបញ្ជាក់ផ្ទៀងផ្ទាត់ដោយអង្គភាពសារព័ត៌មាន Sanad របស់កាសែត Al Jazeera ឃើញលទ្ធផលក្រោយការផ្ទុះគ្រាប់ ។

ឧបទ្ទេវហេតុនេះ បានកើតឡើងរយៈពេល ១ថ្ងៃប៉ុណ្ណោះ ក្រោយក្រុមអាជ្ញាធរស៊ីរី និយាយថា កងកម្លាំងសន្តិសុខ បានសម្លាប់ក្រុមយុទ្ធជន ISIS ៣នាក់ និងបានចាប់ខ្លួនពួកគេបាន ៤នាក់ផ្សេងទៀត នៅខេត្ត Aleppo ។

វាគឺជាលើកដំបូងហើយដែលរដ្ឋាភិបាលស្តីទីស៊ីរី ប្រកាសប្រតិបត្តិការបែបនេះប្រឆាំងក្រុមប្រដាប់អាវុធរដ្ឋអ៊ិស្លាម ។

ក្រសួងមហាផ្ទៃស៊ីរី និយាយនៅក្នុងសេចក្តីថ្លែងការណ៍ថា ការវាយឆ្មក់ខាងលើ បានធ្វើឡើងដោយក្រសួងសន្តិសុខទូទៅ ដោយមានការសម្របសម្រួលជាមួយអគ្គនាយកដ្ឋានស៊ើបការណ៍សម្ងាត់ មានគោលដៅលើកក្រុមភ្នាក់ងារសម្ងាត់ ISIS កំពុងប្រតិបត្តិការនៅទូទាំងខេត្ត Aleppo ហើយមន្រ្តីសន្តិសុខម្នាក់ ត្រូវបានសម្លាប់នៅក្នុងប្រតិបត្តិការមួយនេះ ។

ប្រធានាធិបតីស្តីទីស៊ីរីលោក Ahmed al-Sharaa ដែលបានឡើងកាន់អំណាចនៅទីក្រុងដាម៉ាស កាលពីខែធ្នូ បានប្រឆាំងក្រុម ISISជាយូរមកហើយ ។

កងកម្លាំងរបស់លោកបានធ្វើសង្រ្គាមជាមួយក្រុមព្រះចៅកាលីហ្វប្រកាសដោយខ្លួនឯងមួយនេះ អំឡុងសង្រ្គាមស៊ីវិលស៊ីរី ៕