ក្រសួងការបរទេសប៉ាគីស្ថាន បាននិយាយថា៖«ឧបនាយករដ្ឋមន្ត្រី និងជារដ្ឋមន្ត្រីការបរទេសប៉ាគីស្ថាន លោក Ishaq Dar នៅថ្ងៃចន្ទនេះ បានចាកចេញទៅកាន់ប្រទេសចិន ក្នុងដំណើរបំពេញទស្សនកិច្ចរយៈពេល បីថ្ងៃ ដើម្បីពិភាក្សាអំពី «ស្ថានភាពក្នុងតំបន់ដែលកំពុងវិវឌ្ឍន៍ នៅអាស៊ីខាងត្បូង» រយៈពេលប៉ុន្មានថ្ងៃបន្ទាប់ពីឥណ្ឌា និងប៉ាគីស្ថាន បានវាយប្រហារលើទឹកដីរបស់គ្នាទៅវិញទៅមក។

ស្ថានភាពវិវឌ្ឍន៍នេះ បានកើតឡើង ចំពេលមានបទឈប់បាញ់គ្នារវាងប៉ាគីស្ថាន និងឥណ្ឌា បន្ទាប់ពីជម្លោះយោធារយៈពេល ៤ថ្ងៃ រវាងប្រទេសជិតខាងប្រដាប់អាវុធនុយក្លេអ៊ែរ ក្នុងខែនេះ ឃើញមានការប្រើប្រាស់យន្តហោះចម្បាំង មីស៊ិល យានដ្រូននិងកាំភ្លើងធំ ដែលបានបណ្តាលឲ្យមនុស្សប្រហែល ៧០នាក់ រួមទាំងជនស៊ីវិល បានស្លាប់ នៅសងខាងព្រំដែន។

ក្នុងប៉ុន្មានឆ្នាំថ្មីៗនេះ ឥណ្ឌាត្រូវបានគេមើលឃើញថា ជាដៃគូដ៏សំខាន់ដោយមហាអំណាចលោកខាងលិច ក្នុងនាមជាអ្នកប្រឆាំងសមតុល្យទៅនឹងការកើនឡើងនៃឥទ្ធិពលរបស់ចិន ខណៈពេលដែលទំនាក់ទំនងជាយុទ្ធសាស្រ្ត និងកិច្ចសហប្រតិបត្តិការរវាងប៉ាគីស្ថាន និងប៉េកាំង បានពង្រឹងបន្ថែមទៀត ក្នុងរយៈពេលមួយទសវត្សរ៍ចុងក្រោយនេះ ដោយប្រទេសចិន បានផ្តល់ប្រាក់កម្ចី និងធ្វើការវិនិយោគលើគម្រោងហេដ្ឋារចនាសម្ព័ន្ធដ៏ធំ នៅក្នុងប្រទេសប៉ាគីស្ថាន។

លោក Dar នឹងធ្វើការពិភាក្សាស៊ីជម្រៅជាមួយរដ្ឋមន្ត្រីការបរទេសលោក វ៉ាង យី ( Wang Yi) អំពីស្ថានភាពដែលកំពុងវិវឌ្ឍន៍ និង«ផលប៉ះពាល់សម្រាប់សន្តិភាព និងស្ថិរភាព» នៅអាស៊ីខាងត្បូង ខណៈដែល  ភាគីទាំងពីរ ក៏នឹងពិនិត្យមើលឡើងវិញនូវទិដ្ឋភាពទាំងមូលនៃទំនាក់ទំនងទ្វេភាគីប៉ាគីស្ថាន និងចិន។ នេះបើយោងតាមក្រសួងការបរទេសប៉ាគីស្ថាន។