មេដឹកនាំនៃប្រទេសកាណាដា ចក្រភពអង់គ្លេស និងបារាំង កំពុងថ្កោលទោសការពង្រីកប្រតិបត្តិការយោធា និងសកម្មភាពរបស់អ៊ីស្រាអែលនៅតំបន់ហ្កាហ្សា និងតំបន់ West Bank ដោយបានគំរាមនៅក្នុងសេចក្តីថ្លែងការណ៍រួមមួយកាលពីថ្ងៃចន្ទដើមសប្ដាហ៍នេះក្នុងការចាត់វិធានការជាក់ស្តែង រួមទាំងការដាក់ទណ្ឌកម្មផងដែរ។

សេចក្តីថ្លែងការណ៍បានគូសបញ្ជាក់ពីការខកចិត្តជាអន្តរជាតិកាន់តែខ្លាំងចំពោះការប្រព្រឹត្តរបស់អ៊ីស្រាអែល ដោយលើកឡើងពីកម្រិតមិនអាចអត់ឱនបាននៃការរងទុក្ខរបស់មនុស្សនៅក្នុងតំបន់ហ្កាហ្សា និងការរំលោភច្បាប់អន្តរជាតិម្តងហើយម្តងទៀត។ ក្រុមមេដឹកនាំបានរិះគន់ការប្រកាសរបស់អ៊ីស្រាអែលក្នុងការអនុញ្ញាតឱ្យមានបរិមាណអាហារមូលដ្ឋានមានកំណត់ចូលក្នុងតំបន់ហ្កាហ្សា ដោយហៅវិធានការនេះថាមិនគ្រប់គ្រាន់។ 

សេចក្តីថ្លែងការណ៍បាននិយាយថា ពួកលោកនឹងមិនឈរឱបដៃមើលឡើយ ខណៈពេលរដ្ឋាភិបាលលោក Netanyahu បន្តសកម្មភាពដ៏ព្រៃផ្សៃទាំងនេះ។ប្រសិនបើអ៊ីស្រាអែលមិនបញ្ឈប់ការវាយលុកយោធាជាថ្មី និងលុបចោលការរឹតបន្តឹងរបស់ខ្លួនលើជំនួយមនុស្សធម៌ទេ ពួកលោកនឹងចាត់វិធានការជាក់ស្តែងបន្ថែមទៀតជាការឆ្លើយតបរួមទាំងការដាក់ទណ្ឌកម្មផងដែរ។

 សេចក្តីថ្លែងការណ៍ដដែលបាននិយាយថា ប្រទេសទាំងបីតែងតែគាំទ្រសិទ្ធិរបស់អ៊ីស្រាអែលក្នុងការការពារខ្លួនប្រឆាំងអំពើភេរវកម្ម ប៉ុន្តែបានហៅការកើនឡើងនេះថាជាទង្វើហួសហេតុ។

អ៊ីស្រាអែលបានចាប់ផ្តើមប្រតិបត្តិការផ្លូវអាកាស និងថ្មើរជើងទូទាំងតំបន់ហ្កាហ្សាកាលពីចុងសប្តាហ៍មុន ដោយនិយាយថា ខ្លួននឹងដាក់សម្ពាធក្រុមហាម៉ាសឱ្យដោះលែងចំណាប់ខ្មាំងដែលនៅសល់ពីការវាយប្រហារកាលពីថ្ងៃទី៧ខែតុលា ឆ្នាំ២០២៣។ កងទ័ពបានបញ្ជាឱ្យអ្នកក្រុង Khan Younis ដែលជាទីក្រុងធំបំផុតទីពីររបស់ដែនដីហ្កាហ្សាជម្លៀសចេញ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទសប្ដាហ៍នេះថា អ៊ីស្រាអែលមានផែនការគ្រប់គ្រងទឹកដីហ្កាហ្សាទាំងមូល។សេចក្តីថ្លែងការណ៍របស់ប្រទេសទាំងបីបានរិះគន់យ៉ាងខ្លាំងចំពោះការប៉ុនប៉ងណាមួយដើម្បីពង្រីកការតាំងទីលំនៅ លើតំបន់ West Bank៕