តំបន់កសិកម្មដ៏សំខាន់របស់ប្រទេសអាហ្សង់ទីន ត្រូវបានវាយប្រហារដោយភ្លៀងធ្លាក់ខ្លាំង និងទឹកជំនន់ក្នុងពេលប៉ុន្មានថ្ងៃថ្មីៗនេះ ដោយធ្វើឱ្យចម្ការដំណាំសណ្តែកមួយចំនួនត្រូវលិចលង់នៅក្រោមទឹកភ្លៀងរហូតដល់ ៤០០មីលីម៉ែត្រដ៏កំណត់ត្រានៅក្នុងតំបន់មួយចំនួន ដែលនាំមកនូវទឹកជំនន់រីករាលដាលបំផ្លាញដំណាំស្ទើរតែខ្ទេចខ្ទី និងមនុស្សរាប់ពាន់នាក់ត្រូវជម្លៀសខ្លួន។

កសិករដាំគ្រាប់ធញ្ញជាតិម្នាក់ឈ្មោះ Martin Vivanco នៅតំបន់ជនបទ San Antonio de Areco បទចម្ងាយ ១០០គីឡូម៉ែត្រ ភាគខាងលិចនៃរដ្ឋធានីប៊ុយណូរស៊ែរ បាននិយាយរៀបរាប់ពីទិដ្ឋភាពទឹកជំនន់កាលពីថ្ងៃចន្ទ (១៩ ឧសភា) ថា "គ្រប់ទីកន្លែងមើលទៅគឺដូចជាមហាសមុទ្រ"។ កសិកររូបនេះបន្តថា "ដីស្រែមួយចំនួននៅតំបន់ទំនាប ត្រូវគ្របដណ្ដប់ដោយទឹក ហើយនឹងពិបាកក្នុងការប្រមូលផល ដោយអ្នកខ្លះថែមទាំងបាត់បង់កសិដ្ឋានរបស់ពួកគេទៀតផង"។

អាហ្សង់ទីន ជាប្រទេសនាំចេញប្រេងសណ្តែកសៀង និងដំណាំសណ្តែកសៀងលំដាប់ពិភពលោក និងជាប្រទេសនាំចេញពោតលេខ៣។ អ្នកជំនាញឧតុនិយមអាហ្សង់ទីនបានឱ្យដឹងថា ភ្លៀងធ្លាក់ប៉ុន្មានថ្ងៃនោះមានកម្រិតធ្ងន់ធ្ងរពី ៣ ទៅ ៤ដងខុសពីធម្មតាសម្រាប់ខែឧសភា ដែលបង្កើនការភ័យខ្លាចរបស់កសិករថា ដំណាំសណ្តែក និងពោត អាចទទួលរងការខាតបង់ដ៏ធំ។

កសិករកំពុងប្រឈមនឹងការយឺតយ៉ាវក្នុងការប្រមូលផលដំណាំសណ្ដែកបច្ចុប្បន្ន ដោយសារដីសើម និងផ្លូវភក់រួចទៅហើយ ហើយការបន្តពន្យារពេលប្រមូលផល អាចធ្វើឱ្យដំណាំកើតជំងឺ ឬដុះផ្សិត ដែលក៏ធ្វើឱ្យខាតបង់ធ្ងន់ធ្ងរណាស់ដែរ៕