បេសកជនមជ្ឈិមបូព៌ារបស់អាមេរិក លោក Steve Witkoff បានប្រកាសថាបន្ទាត់ក្រហមរបស់រដ្ឋបាលលោក Donald Trump ក្នុងកិច្ចចរចានុយក្លេអ៊ែរជាមួយអ៊ីរ៉ង់ គឺជាសមត្ថភាពរបស់ក្រុងតេអេរ៉ង់ក្នុងការបង្កើនសារធាតុអ៊ុយរ៉ានីញ៉ូមក្នុងកម្រិតណាមួយ ដែលជំរុញឱ្យអ៊ីរ៉ង់និយាយថា ខ្លួននឹងបន្តការចម្រាញ់ ទោះមាន ឬគ្មានកិច្ចព្រមព្រៀងក៏ដោយ។

លោក Witkoff បានប្រាប់ទូរទស្សន៍ ABC កាលពីថ្ងៃទី១៨ឧសភាថា អាមេរិកមិនអាចអនុញ្ញាតសោះឡើយសូម្បីតែ១%នៃសមត្ថភាពចម្រាញ់សារធាតុនោះ។ ដោយទទូចថាការចម្រាញ់ណាមួយសូម្បីតែសម្រាប់គោលបំណងស៊ីវិលក៏អាចផលិតអាវុធបានដែរ។ 

លោកបាននិយាយថា អ្វីគ្រប់យ៉ាងចាប់ផ្តើម ជាមួយនឹងកិច្ចព្រមព្រៀងដែលមិនរាប់បញ្ចូលការចម្រាញ់សារធាតុអ៊ុយរ៉ានីញ៉ូមឡើយ ព្រោះការសម្រាញ់នេះ អាចបង្កើតឲ្យមានអាវុធ។ ហើយអាមេរិក នឹងមិនអនុញ្ញាតឱ្យមានគ្រាប់បែកលេចមុខឡើងទេ។

រដ្ឋមន្ត្រីការបរទេសអ៊ីរ៉ង់ លោក Abbas Araqchi បានច្រានចោលការទាមទាររបស់លោក Witkoff ភ្លាមៗ ដោយហៅការអះអាងនោះថាមិនច្បាស់លាស់ និងផ្តាច់ចេញពីការពិតនៃការចរចា។

លោក Araghchi បានបង្ហោះនៅលើបណ្ដាញសង្គម X ដោយសង្កត់ធ្ងន់ថាសិទ្ធិរបស់អ៊ីរ៉ង់ក្នុងការចម្រាញ់គឺមិនអាចចរចារបានទេក្នុងនាមជាហត្ថលេខីនៃសន្ធិសញ្ញាមិនរីកសាយអាវុធ (NPT) លោកថា ការចម្រាញ់នៅក្នុងប្រទេសអ៊ីរ៉ង់នឹងបន្តដោយមាន ឬគ្មានកិច្ចព្រមព្រៀង ។

លោកបានបន្ថែមថា ប្រសិនបើ សហរដ្ឋអាមេរិក ចាប់អារម្មណ៍ក្នុងការធានាថា អ៊ីរ៉ង់នឹងមិនមានអាវុធនុយក្លេអ៊ែរ កិច្ចព្រមព្រៀងមួយគឺអាចសម្រេចបាន ហើយអ៊ីរ៉ង់ត្រៀមខ្លួនសម្រាប់ការសន្ទនាដ៏ម៉ឺងម៉ាត់មួយ ដើម្បីសម្រេចបាននូវដំណោះស្រាយដែលនឹងធានាបានលទ្ធផលជារៀងរហូត៕