ការប្រកាសពីជំងឺមហារីករបស់លោកអតីតប្រធានាធិបតីអាមេរិក Joe Biden បានធ្វើឱ្យមានសំណួរជាថ្មីឡើងវិញកាលពីថ្ងៃចន្ទ (១៩ ឧសភា) ពីទំហំនៃបញ្ហាសុខភាពរបស់លោក អំឡុងពេលកាន់តំណែងនៅសេតវិមាន ដោយលោកប្រធានាធិបតី Donald Trump បាននិយាយថា លោក Biden គួរតែមានតម្លាភាពឥតលាក់លៀមជាងនេះជាមួយសាធារណជន។

ក្រោយសម្តែងការអាណិតអាសូរក្នុងបណ្ដាញសង្គម លោក Trump បានប្រាប់អ្នកយកព័ត៌មានកាលពីថ្ងៃចន្ទ (១៩ ឧសភា) ថា "លោកភ្ញាក់ផ្អើលណាស់ដែលសាធារណជនមិនត្រូវជូនដំណឹងយូរមកហើយលើរឿងនេះ ពីព្រោះដើម្បីទៅដល់ដំណាក់កាលទី៩ នៃជំងឺ គឺជាពេលវេលាយូរណាស់"។

លោក Trump បានដាក់ការសង្ស័យលើពេលវេលានៃការធ្វើរោគវិនិច្ឆ័យមហារីកកម្រិតខ្ពស់របស់លោក Biden ស្របពេលការត្រួតពិនិត្យឡើងវិញពីបញ្ហាកាយសម្បទា និងផ្លូវចិត្តរបស់អតីតប្រធានាធិបតីរូបនេះអំឡុងពេលកាន់តំណែង។ លោក Trump ក៏និយាយដែរថា វេជ្ជបណ្ឌិតណាដែលបានពិនិត្យលោក Biden ក្នុងពេលកាន់តំណែងគឺ "មិនបានប្រាប់ការពិតនោះទេ"។

ការិយាល័យលោក Biden បាននិយាយក្នុងសេចក្តីថ្លែងការណ៍មួយក្នុងថ្ងៃអាទិត្យថា អតីតប្រធានាធិបតីរូបនេះ ត្រូវបានធ្វើរោគវិនិច្ឆ័យឃើញថាមានទម្រង់ធ្ងន់ធ្ងរនៃជំងឺមហារីកក្រពេញប្រូស្តាត ដែលរាលដាលដល់ឆ្អឹង។ ក្រុមវេជ្ជបណ្ឌិតបានចាត់ថ្នាក់ជំងឺមហារីករបស់លោក Biden ថាជាកម្រិតទី៩ នៅក្រោមប្រព័ន្ធចាត់ថ្នាក់ Gleason ដែលបង្ហាញថា ដំណាក់កាលនេះស្ថិតក្នុងចំណោមប្រភេទខ្លាំងក្លាបំផុត។

លោក Biden ដែលជាមេដឹកនាំចំណាស់បំផុតសម្រាប់តំណែងជាប្រធានាធិបតី ត្រូវបានបង្ខំឱ្យបោះបង់កិច្ចប្រឺងប្រែងបោះឆ្នោតឡើងវិញរបស់លោកកាលខែកក្កដា ឆ្នាំមុន បន្ទាប់ពីធ្វើមិនបានល្អក្នុងពេលជជែកដេញដោលប្រឆាំងនឹងលោក Trump ដែលបានបំផ្លាញការគាំទ្ររបស់លោកក្នុងចំណោមសមាជិកបក្សប្រជាធិបតេយ្យ៕