មេដឹកនាំកោះតៃវ៉ាន់ លោក Lai Ching-te បាននិយាយនៅថ្ងៃអង្គារ (២០ ឧសភា) នេះអំឡុងពិធីកាន់តំណែងបាន ១ឆ្នាំថា កោះតៃវ៉ាន់ ចង់បានសន្តិភាព និងការសន្ទនាជាមួយប្រទេសចិន ដោយសារតែសង្រ្គាមពុំមានអ្នកឈ្នះនោះទេ ប៉ុន្តែអាជ្ញាធរទីក្រុងតៃប៉ិ ក៏ត្រូវតែបន្តពង្រឹងការការពារកោះនេះដែរ។

ចិន បានហៅលោក Lai ថាជា "ជនផ្ដាច់ខ្លួន" ហើយបានបដិសេធសំណើជាច្រើនរបស់លោកសម្រាប់ការចរចា។ អ្នកនាំពាក្យរដ្ឋាភិបាលកោះ បាននិយាយកាលពីសប្តាហ៍មុនថា តៃវ៉ាន់មិនអាចបដិសេធបានទេនូវលទ្ធភាពដែលថា ចិនអាចប្រារព្ធខួប ១ឆ្នាំនេះដោយការធ្វើសមយុទ្ធយោធា។

ថ្លែងទៅកាន់អ្នកសារព័ត៌មាននៅការិយាល័យមេដឹកនាំកណ្តាលទីក្រុងតៃប៉ិ លោក Lai បាននិយាយថា ពលរដ្ឋកោះតៃវ៉ាន់ និងរូបលោកផ្ទាល់ជាអ្នកស្រឡាញ់សន្តិភាព ពីព្រោះសន្តិភាពមានតម្លៃមិនអាចកាត់ថ្លៃបាន ហើយសង្គ្រាមមិនមានអ្នកឈ្នះទេ ប៉ុន្តែក្នុងពេលស្វែងរកសន្តិភាព កោះតៃវ៉ាន់ក៏នឹងបន្តពង្រឹងការការពាររបស់ខ្លួនដែរ។

ក្រសួងការពារជាតិចិន កាលពីសប្តាហ៍មុនបាននិយាយថា លោក Lai គឺជា "អ្នកបង្កើតវិបត្តិច្រកសមុទ្រតៃវ៉ាន់" ដែលបានបង្កើនការប្រឆាំង និងការប្រឈមមុខដាក់គ្នា ដែលធ្វើឱ្យខូចសន្តិភាព និងស្ថិរភាព។ កាលពីខែមុន ទីក្រុងប៉េកាំង បានរៀបចំហ្គេមសង្រ្គាម (សមយុទ្ធ) ដែលមានឈ្មោះថា "រន្ទះច្រកសមុទ្រ-២០២៥A" នៅជុំវិញកោះតៃវ៉ាន់ ដែលអក្សរ "A" នៅចុងបញ្ចប់នៃឈ្មោះសមយុទ្ធនេះបានបង្ហាញថា អាចនៅមានច្រើនទៀត៕