ភាពមិនប្រាកដប្រជាដែលទាក់ទងនឹងពាណិជ្ជកម្ម បំណុលសារពើពន្ធ និងការចុះខ្សោយនៃទំនុកចិត្តអ្នកប្រើប្រាស់អំពីការស៊ូទ្រាំនឹងមូលធននិយមដ៏ពិសេសប្លែកគេរបស់ទីក្រុងវ៉ាស៊ីនតោន បានដាក់បន្ទុកលើទ្រព្យសម្បត្តិសហរដ្ឋអាមេរិក ដោយបង្កការខូចខាតកាន់តែខ្លាំងដល់ប្រាក់ដុល្លារ ដែលកំពុងធ្លាក់ចុះរួចទៅហើយ ខណៈវិនិយោគិនមើលឃើញថា រូបិយប័ណ្ណដុល្លារដែលចាត់ទុកថាជា "ម៉ាកយីហោសហរដ្ឋអាមេរិក" មួយនេះ បាត់បង់ភាពភ្លឺស្វាងរបស់ខ្លួនកាន់តែច្រើន។

ពន្ធរបស់រដ្ឋបាលលោកប្រធានាធិបតី Donald Trump នៅឆ្នាំនេះ បានជំរុញឱ្យវិនិយោគិន ដកខ្លួនពីទ្រព្យសម្បត្តិអាមេរិក បន្ទាប់ពីរយៈពេលដ៏យូរនៃភាពលេចធ្លោសេដ្ឋកិច្ច។ ខណៈរូបិយប័ណ្ណរបស់អាមេរិក មានស្ថិរភាពខ្លះៗក្នុងវគ្គជួញដូរថ្មីៗដោយសារភាពធូរស្បើយក្នុងសង្គ្រាមពាណិជ្ជកម្មអាមេរិក-ចិន ពេលនេះប្រាក់ដុល្លារបានស្ថិតនៅក្រោមសម្ពាធនៃការសម្រុកលក់ចេញជាថ្មី បន្ទាប់ពីទីភ្នាក់ងារវាយតម្លៃ Moody's បន្ទាបចំណាត់ថ្នាក់ទំនុកចិត្តឥណទានដ៏មានតម្លៃរបស់អាមេរិក។

លោក George Vessey អ្នកជំនាញយុទ្ធសាស្រ្តទីផ្សារម៉ាក្រូ បាននិយាយថា "ការសម្រុកលក់ប្រាក់ដុល្លារ" ក្លាយជាការផ្តោតឡើងវិញ បន្ទាប់ពីក្រុមហ៊ុន Moody's ទម្លាក់ចំណាត់ថ្នាក់ឥណទានអាមេរិក។ យោងតាមទិន្នន័យ CFTC បានឱ្យដឹងថា សន្ទស្សន៍ប្រាក់ដុល្លារអាមេរិក បានធ្លាក់ចុះដល់ទៅ ១០,៦% ពីកម្រិតខ្ពស់ក្នុងខែមករារបស់ខ្លួន ដែលជាជំហានដកថយខ្លាំងបំផុតមួយក្នុងពេលបីខែ។

វិនិយោគិន និងអ្នកយុទ្ធសាស្រ្ត បានចាត់ទុកប្រាក់ដុល្លារថាមានតម្លៃលើសលប់អស់ជាច្រើនឆ្នាំមកហើយ ខណៈការភ្នាល់ប្រឆាំងនឹងរូបិយប័ណ្ណនេះក៏បង្ហាញពីភាពឈឺចាប់ម្តងហើយម្តងទៀតនៅពេលសេដ្ឋកិច្ចអាមេរិកកំពុងដំណើរការយ៉ាងល្អ ប៉ុន្តែរឿងនោះប្រហែលជានឹងផ្លាស់ប្តូរហើយ៕