មន្ត្រីសហរដ្ឋអាមេរិក បាននិយាយកាលពីថ្ងៃចន្ទថា អនុប្រធានាធិបតី លោក JD Vance បានថ្វាយលិខិតមួយច្បាប់ដល់សម្តេចប៉ាប លីអូ ក្នុងអំឡុងជំនួប ដោយយាងសម្តេចប៉ាប ទៅធ្វើទស្សនកិច្ចនៅសហរដ្ឋអាមេរិក និងសេតវិមាន។

អ្នកនាំពាក្យសេតវិមាន លោកស្រី Karoline Leavitt បាននិយាយថា លិខិតរបស់លោក Vance បានយាងព្រះអង្គក្នុងនាមប្រធានាធិបតី លោក Donald Trump និងស្ត្រីទីមួយ លោកស្រី Melania Trump ។

សម្តេចប៉ាប លីអូ ទី១៤ ជាពលរដ្ឋអាមេរិក ជាអ្នកដែលបានរិះគន់គោលនយោបាយអន្តោប្រវេសន៍ដ៏តឹងរឹងរបស់រដ្ឋបាល លោក Trump កាលពីថ្ងៃចន្ទ ទី១៩ ខែឧសភា បានជួបនៅបុរីវ៉ាទីកង់ ជាមួយអនុប្រធានាធិបតីសហរដ្ឋអាមេរិក លោក JD Vance ជាអ្នកដែលបានប្តូរទៅជានីកាយរ៉ូម៉ាំងកាតូលិកនិយម នៅពេលពេញវ័យ។

សម្តេបប៉ាប Leo ត្រូវបានជ្រើសរើសជាសម្តេចប៉ាបថ្មី កាលពីថ្ងៃទី៨ ខែឧសភា។ ខណៈនៅជាមន្ត្រីសង្ឃជាន់ខ្ពស់ ព្រះអង្គបានចេញការបង្ហោះមិនឯកភាពជាច្រើនលើកអំពីគោលនយោបាយនានារបស់រដ្ឋបាលនេះ នៅលើគណនីបណ្តាញ X របស់ទ្រង់ ដែលបង្ហាញពីការព្រួយបារម្ភរបស់ព្រះអង្គចំពោះជនអន្តោប្រវេសន៍។