អ្នកនាំពាក្យក្រសួងបរទេសប្រទេសប៉ាគីស្ថានកាលពីថ្ងៃចន្ទ បានច្រានចោលរបាយការណ៍ «គ្មានមូលដ្ឋាន»របស់ប្រព័ន្ធផ្សព្វផ្សាយឥណ្ឌាដែលអះអាងថា ទីក្រុងអ៊ីស្លាម៉ាបាដ បានពង្រាយមីស៊ីល Shaheen ដែលមានសមត្ថភាពបំពាក់នុយក្លេអ៊ែររបស់ខ្លួន ប្រឆាំងនឹងប្រទេសឥណ្ឌា ក្នុងជម្លោះនាពេលថ្មីៗនេះ រវាងប្រទេសទាំងពីរ។

ប្រទេសឥណ្ឌា និងប៉ាគីស្ថាន បានចូលរួមក្នុងការប្រយុទ្ធគ្នាដ៏អាក្រក់បំផុត រវាងប្រទេសជិតខាងប្រដាប់ដោយអាវុធនុយក្លេអ៊ែរទាំងពីរ កាលពីដើមខែនេះ ចាប់តាំងពីឆ្នាំ ១៩៩៩មក ។ ទាំងប៉ាគីស្ថាន និងឥណ្ឌា បានវាយប្រហារគ្នាទៅវិញទៅមកដោយមីស៊ីល យន្តហោះចម្បាំង យានដ្រូន និងការបាញ់កាំភ្លើងធំរយៈពេល ៤ថ្ងៃ មុនពេលប្រធានាធិបតីអាមេរិក លោក ដូណាល់ ត្រាំ ( Donald Trump) ប្រកាសបទឈប់បាញ់ នៅថ្ងៃទី ១០ ខែឧសភា។

កងទ័ពឥណ្ឌា បានចែករំលែកវីដេអូមួយនៅលើបណ្តាញសង្គម Twitter កាលពីថ្ងៃអាទិត្យ ដោយបង្ហាញពីការប្រើប្រាស់មីស៊ីល Shaheen របស់ប៉ាគីស្ថាន។ វីដេអូនេះ ត្រូវបានចេញផ្សាយ ដោយប្រព័ន្ធផ្សព្វផ្សាយឥណ្ឌាមួយចំនួន ដូចជាទូរទស្សន៍ NDTV និងសារព័ត៌មាន News Arena India។

ក្រសួងការបរទេសប្រទេសប៉ាគីស្ថាន បាននិយាយថា ទោះជាយ៉ាងណាក៏ដោយ កងទ័ពឥណ្ឌាបានលុប   វីដេអូនេះចេញពីគណនី Twitter របស់ខ្លួន បន្ទាប់ពីដឹងថា «ការអះអាងនេះ មិនមានភ័ស្តុតាងបញ្ជាក់»។