អតីតប្រធាន ICC បាននិយាយកាលពីថ្ងៃចន្ទថា  មេដឹកនាំកូរ៉េខាងជើង លោក គីម ជុងអ៊ុន អាចប្រឈម នឹងការស៊ើបអង្កេតឧក្រិដ្ឋកម្មសង្រ្គាម នៅតុលាការឧក្រិដ្ឋកម្មអន្តរជាតិ (ICC) ដែលមានមូលដ្ឋាននៅទីក្រុងឡាអេ សម្រាប់ការគាំទ្រសង្គ្រាមរបស់រុស្ស៊ីប្រឆាំងនឹងអ៊ុយក្រែន ដោយបន្ថែមថា នេះគឺជាពេលវេលាដ៏ត្រឹមត្រូវសម្រាប់លោក គីម ដែលនឹងត្រូវនាំខ្លួនមកកាត់ទោស។

លោក Song Sang-hyun អតីតប្រធានតុលាការ ICC បានធ្វើការអត្ថាធិប្បាយ នៅក្នុងសន្និសីទអន្តរជាតិនៅទីក្រុងសេអ៊ូល ខណៈដែលប្រទេសកូរ៉េខាងជើង បានបញ្ជាក់ជាលើកដំបូងកាលពីខែមុនថា ខ្លួនបានដាក់ពង្រាយកងទ័ព ទៅកាន់ប្រទេសរុស្ស៊ី ដើម្បីគាំទ្រដល់សង្គ្រាមរបស់ទីក្រុងមូស្គូ ប្រឆាំងនឹងអ៊ុយក្រែន។

អតីតប្រធានតុលាការ ICC រូបនេះ បានបញ្ជាក់ថា លោក គីម មិនទាន់ត្រូវបានបញ្ជូនទៅ ICC នៅឡើយទេ បើទោះបីជាមានការរំលោភសិទ្ធិមនុស្សរបស់លោក នៅក្នុងប្រទេសកូរ៉េខាងជើង ប៉ុន្តែស្តង់ដាផ្លូវច្បាប់ត្រូវបានបំពេញនៅពេលនេះ សម្រាប់អ៊ុយក្រែនក្នុងការបន្តសំណុំរឿងប្រឆាំងនឹងលោក នៅតុលាការ ICC ជុំវិញជំនួយរបស់កូរ៉េខាងជើង ក្នុងសង្គ្រាមរុស្ស៊ី និងអ៊ុយក្រែន។

លោក Song បាននិយាយនៅក្នុងសុន្ទរកថាសំខាន់របសខ្លួន នៅក្នុងព្រឹត្តិការណ៍នោះថា៖«ពេលវេលាត្រឹមត្រូវក្នុងការនាំលោក គីម ជុងអ៊ុន ទៅកាន់តុលាការ ICC ដោយបន្ថែមថា ជំនួយយោធារបស់ទីក្រុងព្យុងយ៉ាងដល់ប្រទេសរុស្ស៊ី បានផ្តល់ឲ្យអ៊ុយក្រែននូវស្តង់ដាផ្លូវច្បាប់ ដើម្បីដាក់ពាក្យបណ្តឹងប្រឆាំងនឹងកូរ៉េខាងជើង ក្នុងនាមជាជនរងគ្រោះ។

លោក Song បាននិយាយថា៖«មានឱកាសមួយសម្រាប់អាជ្ញាធរអ៊ុយក្រែន ក្នុងនាមជាជនរងគ្រោះ ដើម្បីដាក់ពាក្យបណ្តឹងប្រឆាំងនឹងប្រទេសកូរ៉េខាងជើងទៅកាន់តុលាការ ICC»។ «ខណៈដែលពាក្យបណ្ដឹងដែលដាក់ដោយអ៊ុយក្រែន នឹងមានលក្ខណៈល្អបំផុត តុលាការ ICC ក៏មានសិទ្ធិអំណាច ក្នុងការផ្ដួចផ្ដើមការស៊ើបអង្កេតឯករាជ្យ»។