អ្នកនាំពាក្យសេតវិមានអ្នកស្រី Karoline Leavitt បានបញ្ជាក់ថា ប្រធានាធិបតីអាមេរិកលោក ដូណាល់ ត្រាំ (Donald Trump) នៅតែចង់ឲ្យតំបន់ Greenland ក្លាយជាផ្នែកមួយរបស់សហរដ្ឋអាមេរិក។

អ្នកស្រីបាននិយាយនៅក្នុងសន្និសីទសារព័ត៌មានថា៖«លោកប្រធានាធិបតី រក្សាហេតុផលសម្រាប់គោលបំណងយុទ្ធសាស្ត្រសម្រាប់ Greenland នៅតំបន់អាក់ទិក ហើយលោកនៅតែបន្តប្តេជ្ញាចិត្តចំពោះគំនិតនៃការទទួលបានតំបន់ Greenland តាមគ្រប់មធ្យោបាយ ដែលយើងអាចធ្វើបាន ដើម្បីជំរុញផលប្រយោជន៍សន្តិសុខជាតិរបស់យើង នៅក្នុងតំបន់នេះ។

លោក ត្រាំ បាននិយាយម្តងហើយម្តងទៀតថា Greenland ដែលជាតំបន់ស្វយ័តមួយ នៅក្នុងប្រទេសដាណឺម៉ាក គួរតែក្លាយជាផ្នែកមួយរបស់សហរដ្ឋអាមេរិក។ ឯករាជ្យភាពរបស់កោះនេះ គឺជាប្រធានបទសំខាន់មួយ នៅក្នុងការបោះឆ្នោតសភា Greenland ក្នុងខែមីនា។ ការស្ទាបស្ទង់មតិ បង្ហាញថា ភាគច្រើននៃប្រជាជននៅតំបន់ Greenland ចង់បានកោះនេះ ប៉ុន្តែពួកគេមិនទាន់បានសម្រេចចិត្តថាតើនៅពេលណា និងរបៀបនៃការបំបែកខ្លួននឹងកើតឡើងនោះទេ។ ការស្ទង់មតិក្នុងខែមករា បានបង្ហាញថា មានតែ ៦% នៃប្រជាជន ដែលចង់ចូលរួមជាមួយសហរដ្ឋអាមេរិក។

កាលពីដើមខែឧសភា លោក ត្រាំ មិនបានច្រានចោលការប្រើប្រាស់កម្លាំងយោធា ដើម្បីដោះស្រាយបញ្ហានោះទេ។ អនុប្រធានាធិបតីអាមេរិក លោក JD Vance បាននិយាយកាលពីចុងខែមីនាថា រដ្ឋាភិបាលអាមេរិក រំពឹងថា តំបន់Greenland នឹងទទួលបានឯករាជ្យ និងចូលរួមជាមួយសហរដ្ឋអាមេរិកដោយសន្តិវិធី។ លោក Vance បាននិយាយថា ទីក្រុងវ៉ាស៊ីនតោន មិនបានធ្វើការគំរាមកំហែងខាងយោធាទេ។