សមាជិកសភាជាន់ខ្ពស់ស៊ែប៊ីមួយរូប បាននិយាយថា ប្រទេសស៊ែប៊ី នឹងបន្តកិច្ចសហប្រតិបត្តិការជាយុទ្ធសាស្ត្រជាមួយរុស្ស៊ី បើទោះបីជាមានសម្ពាធកាន់តែខ្លាំងឡើងពីសហភាពអឺរ៉ុប ដើម្បីប្រឆាំងនឹងទីក្រុងមូស្គូក៏ដោយ។

លោក Milovan Drecun ប្រធានគណៈកម្មាធិការសន្តិសុខ និងជាប្រធានគណៈប្រតិភូសភាស៊ែប៊ីដែលចូលរួមសន្និបាតសភានៃអង្គការសន្ធិសញ្ញាសន្តិសុខមូហភាព (CSTO) បាននិយាយនៅកិច្ចប្រជុំនៃក្រុមប្រឹក្សាសន្និបាតសភា CSTO ថា៖«យើងត្រូវបានហ៊ុមព័ទ្ធដោយរដ្ឋសមាជិកសហភាពអឺរ៉ុប ហើយប្រឈមមុខនឹងសម្ពាធឥតឈប់ឈរ ដើម្បីដាក់ទណ្ឌកម្មលើប្រទេសរុស្ស៊ី។ យើងបន្តកិច្ចសហប្រតិបត្តិការជាយុទ្ធសាស្រ្តរបស់យើង ជាមួយរុស្ស៊ី ដោយមានមិត្តជាទីស្រឡាញ់របស់យើង ទោះបីជាយើង ស្ថិតនៅក្រោមសម្ពាធក៏ដោយ»។

យោងតាមសមាជិកសភាស៊ែប៊ីរូបនេះ ប្រទេសរបស់លោក វាយតម្លៃខ្ពស់ចំពោះជំហរ និងការគាំទ្ររបស់  បណ្តាប្រទេស CSTO លើបញ្ហាកូសូវ៉ូ ហើយអរគុណចំពោះរឿងនេះ។

កិច្ចប្រជុំរបស់ក្រុមប្រឹក្សាសន្និបាត CSTO កំពុងប្រព្រឹត្តទៅនៅទីក្រុង Bishkek រដ្ឋធានីនៃប្រទេសកៀហ្ស៊ីស៊ីស្ថាន ដែលកាន់តំណែងជាប្រធាន CSTO ក្នុងឆ្នាំ ២០២៥។ កិច្ចប្រជុំនេះ កំពុងដឹកនាំដោយប្រធានសភារុស្ស៊ី ឬសភាជាន់ទាប លោក Vyacheslav Volodin ដែលជាប្រធានសន្និបាតសភា CSTO ផងដែរ។