​អាហ្វ្រិក៖ អង្គការ​សុខភាព​ពិភពលោក​បាន​និយាយ​កាលពី​ថ្ងៃ​អង្គា​រថា ទ្វីបអាហ្វ្រិក​ទំនងជា​មិន​ឈាន​ដល់​គោល​ដៅ​នៃ​ការចាក់​វ៉ាក់សាំង ៧០% នៃ​ចំនួន​ប្រជាជន ១.៣​ពាន់​លាន​នាក់​របស់ខ្លួន​ប្រឆាំង​វីរុស COVID-19 បាន​នោះទេរហូតដល់​ចុងឆ្នាំ២០២៤ ជា​គោលដៅ​ដែលប្រទេស​អ្នកមាន​នៅលើពិភពលោក​ជាច្រើន​បានសម្រេច​រួចរាល់​ហើយ​។ ការព្រមាន​នេះ​ធ្វើឡើង​នៅពេលដែល​ពិភពលោក​ប្រឈមមុខ ​ទៅនឹង​ការកើនឡើង​ថ្មី​នៃ​ករណី​ឆ្លងដែលជំរុញ​ដោយ​វីរុស​ប​ម្លែ​ង​ខ្លួន​ថ្មី Omicron។

​មន្ត្រី​សុខាភិបាល​នៅ​ប្រទេស​អាហ្វ្រិក​ខាងត្បូង ដែល​បានប្រកាស​ជា​លើកដំបូង​អំពី​វីរុស​ប​ម្លែ​ង​ខ្លួន​ថ្មីបាន​និយាយថា ទិន្នន័យ​ដំបូងបង្ហាញថា វីរុស​ថ្មី​នេះ​បណ្តាលឱ្យមាន​ជំងឺ​ស្រាល និង​ការចូល​សម្រាកនៅក្នុង​មន្ទីរពេទ្យ​រយៈពេល​ខ្លី​។ ប៉ុន្តែ​ប្រទេស​អ្នកមាន​មួយចំនួន​បានប្រញាប់ប្រញាល់​អនុញ្ញាត ឱ្យ​ចាក់​វ៉ាក់សាំង​ដូ​ស​ជំរុញ​ជាការ​ឆ្លើយតប​ទៅនឹង​វីរុស ទោះបី​ជាមាន​តិចជាង ​៨%​ នៃ​ចំនួន​ប្រជាជននៅ​ទ្វីបអាហ្វ្រិក​បាន​ចាក់​វ៉ាក់សាំង​ចំនួន ២​ដូ​ស​ក៏ដោយ​។ មានតែ​ប្រទេស​ចំនួន ២០ នៃ​ប្រទេស​នៅ​ទ្វីបអាហ្វ្រិក​ក្នុងចំណោម​ប្រទេស​ចំនួន​ ៥៤ ប៉ុណ្ណោះដែល​បាន​ចាក់​វ៉ាក់សាំង​ពេញលេញមាន​ត្រឹមតែ ១០​% នៃ​ចំនួន​ប្រជាជន​របស់​ពួកគេក្នុងការ​បង្ការ​វីរុស COVID-19 ខណៈប្រទេស​ចំនួន ១០ បាន​ចាក់​វ៉ា​ក់សាំង​ពេញលេញតិចជាង ២% នៃ​ចំនួន​ប្រជាជន​របស់​ពួកគេ​។

​នាយក​អង្គការ​សុខភាព​ពិភពលោក​ប្រចាំ​ទ្វីបអាហ្វ្រិកលោកស្រី Matshidiso Moeti បានបដិសេធលើ​ការលើកឡើង​ទាំងឡាយណា​ដែល​ថា ប្រទេស​នៅ​ទ្វីបអាហ្វ្រិក​ធ្វើ​ឲ្យ​វ៉ាក់សាំង​មួយចំនួន​ខូចក្នុងពេល​មាន​រចនាសម្ព័ន្ធ​មិនល្អ និង​ការស្ទាក់ស្ទើរ​ក្នុង​ការចាក់​វ៉ាក់សាំង​។ ប៉ុន្តែលោកស្រី Moeti បាន​និយាយថា ទ្វីបអាហ្វ្រិក​បានទទួល​វ៉ាក់សាំង​ប្រមាណ ៤៣៤លាន​ដូ​ស ហើយ​ប្រមាណ ៩១០,០០០ នៃ​ដូ​ស​វ៉ាក់សាំង​បាន​ផុតកំណត់​នៅក្នុង ២០ ប្រទេស​។ លោកស្រី​បាន​និយាយថា បញ្ហា​ប្រឈម​ចម្បងនៅក្នុង​ទ្វីបអាហ្វ្រិកនៅតែមាន​លទ្ធភាព​ទទួលបានការ​ផ្គត់ផ្គង់​វ៉ាក់សាំង​៕​

អត្ថបទ៖ ប៊ុនថន