រដ្ឋមន្ត្រីការបរទេសចិនលោក Wang Yi បានប្រាប់សមភាគីដាណឺម៉ាកកាលពីថ្ងៃចន្ទ (ទី១៩ ខែឧសភា) ថា ប្រទេសចិនគោរពយ៉ាងពេញទំហឹង ចំពោះអធិបតេយ្យភាព និងបូរណភាពដែនដីរបស់ប្រទេសដាណឺម៉ាក ជុំវិញបញ្ហាហ្គ្រីនលែនដ៍ (Greenland) ដោយជំរុញឲ្យប្រជាជាតិអ៊ឺរ៉ុបមួយនេះបង្ហាញនូវសេចក្ដីគោរពតបវិញ ពាក់ព័ន្ធនឹងក្ដីបារម្ភ អំពីអធិបតេយ្យភាពរបស់ចិន។

គួររំលឹកថា ក្នុងប៉ុន្មានខែថ្មីៗនេះ ប្រធានាធិបតីអាមេរិក លោក Donald Trump បានលើកឡើងដដែលៗថា ទីក្រុងវ៉ាស៊ីនតោន គួរតែបានកាន់កាប់ទីតាំងយុទ្ធសាស្ត្រនេះ ដែលជាដែនដីពាក់កណ្តាលស្វយ័តរបស់ដាណឺម៉ាក។

នៅទីក្រុងប៉េកាំង កាលពីថ្ងៃទី១៩ ខែឧសភា លោក Wang បានប្រាប់រដ្ឋមន្ត្រីការបរទេសដាណឺម៉ាក លោក Lars Lokke Rasmussen ថា ទីក្រុងប៉េកាំងសង្ឃឹមថា ប្រទេសដាណឺម៉ាកនឹង «បន្តគាំទ្រគោលជំហរស្របច្បាប់របស់ប្រទេសចិន ជុំវិញបញ្ហាទាក់ទងនឹងអធិបតេយ្យភាព និងបូរណភាពដែនដីរបស់ប្រទេសចិន»។

គួរបញ្ជាក់ថា ជំនួបនេះបានកើតមានឡើងបន្ទាប់ពីទីក្រុងប៉េកាំងបានរិះគន់ដាណឺម៉ាក ពាក់ព័ន្ធនឹងការធ្វើជាម្ចាស់ផ្ទះស្វាគមន៍អតីតមេដឹកនាំកោះតៃវ៉ាន់ លោកស្រី Tsai Ing-wen (សៃ អ៊ីន-វិន) កាលពីសប្តាហ៍មុន ជាកន្លែងដែលលោកស្រីបានជួបសមាជិកសភាដាណឺម៉ាក និងថ្លែងសុន្ទរកថា នៅឯកិច្ចប្រជុំកំពូលលទ្ធិប្រជាធិបតេយ្យ ក្នុងទីក្រុង Copenhagen (កូប៉ិនហាក)។

ក្នុងឱកាសនោះ លោក Wang បានបញ្ជាក់ប្រាប់លោក Rasmussen ថា ប្រទេសចិនមានឆន្ទៈក្នុងការធ្វើឲ្យកាន់តែស៊ីជម្រៅកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយប្រទេសដាណឺម៉ាក ក៏ដូចជាកិច្ចសហប្រតិបត្តិការនវានុវត្តន៍វិទ្យាសាស្ត្រ និងសេដ្ឋកិច្ចបៃតង។

លោកបាននិយាយទៀតថា ភាគីទាំង២ ចែករំលែកការឯកភាពគ្នាយ៉ាងទូលំទូលាយ ជុំវិញការការពារគោលនយោបាយពហុភាគីនិយម និងការពារពាណិជ្ជកម្មសេរី ហើយលោកបានបន្ថែមថា ប្រទេសចិនមានឆន្ទៈក្នុងការពង្រឹងកិច្ចសន្ទនា និងកិច្ចសហប្រតិបត្តិការជាមួយសហភាពអឺរ៉ុប៕