ក្រុមមន្ត្រីបានប្រាប់ឲ្យដឹងថា កាលពីថ្ងៃចន្ទ (ទី១៩ ខែឧសភា) ភ្លៀងធ្លាក់ខ្លាំង បានបង្ខំឲ្យមានការផ្អាកនូវដំណើរការស្វែងរករបស់ឥណ្ឌូនេស៊ី ចំពោះមនុស្ស ១៤នាក់ ដែលបាត់ខ្លួននៅក្នុងតំបន់ចុងភាគខាងកើតនៃខេត្ត Papua បន្ទាប់ពីបំណាក់ដី នៅអណ្តូងរ៉ែមាសមួយ បានបណ្ដាលឲ្យកម្មករ ៦នាក់ស្លាប់ និង ៤នាក់រងរបួស។

អ្នកនាំពាក្យទីភ្នាក់ងារកាត់បន្ថយគ្រោះមហន្តរាយរបស់ប្រទេសឥណ្ឌូនេស៊ី លោក Abdul Muhari បាននិយាយថា ភ្លៀងបានបង្កជាបំណាក់ដី កាលពីថ្ងៃទី១៦ ខែឧសភា ដែលបានកើតមានអណ្តូងរ៉ែតូចមួយដំណើរការដោយអ្នកស្រុកតំបន់ភ្នំ Arfak នៃខេត្ត West Papua។

អាជ្ញាធរនឹងចាប់ផ្ដើមដំណើរការស្វែងរករបស់ពួកគេឡើងវិញ នៅថ្ងៃអង្គារ (ទី២០ ខែឧសភា) នេះ សម្រាប់អ្នកបាត់ខ្លួន បន្ទាប់ពីមានគ្រោះមហន្តរាយដែលបានលេបត្របាក់ជម្រកបណ្តោះអាសន្នប្រើប្រាស់ដោយកម្មករអណ្ដូងរ៉ែ។

ប្រធានក្រុមអ្នកជួយសង្គ្រោះមានសមាជិក ៤០នាក់ ក្នុងនោះរួមមានទាំងមន្ត្រីនគរបាល និងយោធា ដែលបានទាញសពបានចំនួន ៥នាក់ គឺលោក Yefri Sabaruddin បានប្រាប់សារព័ត៌មាន Reuters ថា កិច្ចប្រឹងប្រែងស្វែងរកត្រូវបានជួបឧបសគ្គដោយសារ «ផ្លូវដែលខូច និងផ្លូវភ្នំ ក៏ដូចជាអាកាសធាតុអាក្រក់»។

លោកបានបន្ថែមថា ការធ្វើដំណើរទៅកាន់កន្លែងនោះ ត្រូវចំណាយពេល ១២ម៉ោង ពីទីក្រុងនៅជិតបំផុត។ តួលេខសរុប កាលពីថ្ងៃទី១៩ ខែឧសភា ត្រូវបានធ្វើបច្ចុប្បន្នភាពពីតួលេខមុននោះ ដែលបង្ហាញថា មានអ្នកស្លាប់ម្នាក់ និង ១៩នាក់ បាត់ខ្លួន៕