រដ្ឋជាសមាជិកនៃអង្គការសុខភាពពិភពលោក (WHO) កាលពីថ្ងៃចន្ទ (ទី១៩ ខែឧសភា) បានច្រានចោលសំណើអញ្ជើញកោះតៃវ៉ាន់ឲ្យចូលរួមសន្និបាតប្រចាំឆ្នាំរបស់ខ្លួន នៅទីក្រុងហ្សឺណែវ ប្រទេសស្វីស បន្ទាប់ពីប្រទេសចិនបានបង្ហាញការជំទាស់។

ប្រទេស Belize (បេលីហ្ស៍) និង Saint Vincent & Grenadines (សាំងវ៉ាំងសង់ និងហ្គ្រេណាឌីនស៍) ដែលស្ថិតក្នុងចំណោមប្រទេសនៅសេសសល់ចំនួន ១២ ដែលមានទំនាក់ទំនងការទូតជាផ្លូវការជាមួយកោះតៃវ៉ាន់ បាននិយាយតំណាងឲ្យក្រុមប្រទេសដែលបាននាំយកសំណើដាក់បញ្ចូលកោះនេះជាអ្នកសង្កេតការណ៍ នៅក្នុងកិច្ចប្រជុំរបស់ WHO នៅឆ្នាំនេះ។ វ៉ាំងសង់ (Saint Vincent) បានពណ៌នាការមិនអនុញ្ញាតឲ្យកោះតៃវ៉ាន់ចូលរួមនេះថា ជា «រឿងមិនត្រឹមត្រូវ» ហើយបេសកជនរបស់បេលីហ្ស៍ (Belize) បាននិយាយថា ការធ្វើបែបនេះ «នាំឲ្យចុះខ្សោយនូវសមត្ថភាពត្រៀម និងការឆ្លើយតបរួមរបស់យើង»។

តែយ៉ាងណាក្ដី គ្មានប្រទេសលោកខាងលិចធំណាមួយ បាននិយាយគាំទ្រកោះតៃវ៉ាន់ ឬចុះហត្ថលេខាលើសំណើនេះទេ ហើយសហរដ្ឋអាមេរិកដែលមានគម្រោងចាកចេញពី WHO បានទុកកៅអីរបស់ខ្លួនឲ្យនៅទំនេរ។ ប្រទេសចិន ដែលចាត់ទុកកោះតៃវ៉ាន់គ្រប់គ្រងតាមបែបប្រជាធិបតេយ្យជាដែនដីរបស់ខ្លួន និងប៉ាគីស្ថាន បានជំទាស់នឹងសំណើនេះ ហើយអង្គសន្និបាតបានទទួលយកការមិនរួមបញ្ចូលកោះតៃវ៉ាន់។

ឯកអគ្គរដ្ឋទូតចិន លោក Chen Xu ដែលជាផ្នែកមួយនៃគណៈប្រតិភូចិនមានសមាជិកជាង ២០០នាក់ នៅក្នុងកិច្ចប្រជុំនោះ បានលើកឡើងថា៖ «សំណើនេះ ជំទាស់ដោយបើកចំហចំពោះសិទ្ធិអំណាចរបស់អង្គការសហប្រជាជាតិ និងសណ្តាប់ធ្នាប់អន្តរជាតិ ក្រោយសង្គ្រាម»។

ចំណែកសេចក្តីថ្លែងការណ៍របស់ក្រសួងការបរទេសចិន បានឲ្យដឹងថា ជំហរ «ផ្តាច់ខ្លួន» របស់អាជ្ញាធរកោះតៃវ៉ាន់ បាននាំឲ្យបាត់បង់មូលដ្ឋានគ្រឹះនយោបាយ សម្រាប់ការចូលរួមរបស់ខ្លួន នៅក្នុងសន្និបាតនេះ។ ហើយក្រសួងបានបដិសេធថា ការលើកឡើងណាមួយ ដែលថា ការត្រៀមទប់ទល់ជំងឺរាតត្បាត ត្រូវបានប៉ះពាល់ដោយសារតែការមិនរួមបញ្ចូលកោះតៃវ៉ាន់នេះ ដោយហៅការនិយាយនោះថា ជា «ការកុហកផ្នែកនយោបាយ»៕