អ្នកបើកតាក់ស៊ីបាននាំគ្នាដុតក្ដារឈើ និងសំបកកង់រថយន្ត នៅកណ្តាលទីក្រុងប៉ារីស កាលពីថ្ងៃចន្ទ (ទី១៩ ខែឧសភា) ហើយនគរបាលបានបាញ់ឧស្ម័នបង្ហូរទឹកភ្នែក អំឡុងមានការតវ៉ាទូទាំងប្រទេសជំទាស់នឹងការកែប្រែតម្លៃសេវា សម្រាប់ការដឹកជញ្ជូនករណីវេជ្ជសាស្ត្រ។

រថយន្តតាក់ស៊ីជិត ១.០០០គ្រឿង បានបិទផ្លូវក្នុងរដ្ឋធានី ហើយនគរបាល បានប្រាប់ថា មនុស្ស ៦៤នាក់ត្រូវបានចាប់ខ្លួន។ នគរបាលបានបាញ់ឧស្ម័នបង្ហូរទឹកភ្នែកទៅលើអ្នកបើកបរប្រមាណ ២៥០នាក់ ដែលបានព្យាយាមទម្លុះរបងសន្តិសុខ។

ក្រុមមួយផ្សេងទៀតបានព្យាយាមបំបែកខ្លួនចេញ ហើយធ្វើដំណើរឆ្ពោះទៅកាន់ការិយាល័យនាយករដ្ឋមន្ត្រី ប៉ុន្តែក៏ត្រូវបានបញ្ឈប់ផងដែរ។ ការតវ៉ាបានធ្វើឲ្យរថយន្តកកស្ទះនៅលើមហាវិថីមួយដែលរត់ចេញពីតំបន់ Saint-German នៃរដ្ឋធានី និងផ្លូវនៅក្បែរនោះ។

អ្នកបើកបរបានត្អូញត្អែរថា តម្លៃសេវាទាប សម្រាប់ការដឹកជញ្ជូនអ្នកដំណើរដែលមានឯកសារបញ្ជាក់ថា មានជំងឺ នឹងកាត់បន្ថយប្រាក់ចំណូលរបស់ពួកគេជាង ១ភាគ៤។ រដ្ឋាភិបាលបារាំងដែលស្ថិតក្រោមសម្ពាធ ដើម្បីទប់ការកើនឡើងនូវថ្លៃសេវាសុខភាព បានបញ្ជាឲ្យមានកំណែទម្រង់ កាលពីសប្តាហ៍មុន ដែលនឹងចូលជាធរមានចាប់ពីខែតុលា៕