ដោយដកស្រង់សម្តីនគរបាល ប្រព័ន្ធផ្សព្វផ្សាយក្នុងស្រុកបានរាយការណ៍ថា អាជ្ញាធរឥណ្ឌា បានចាប់ខ្លួនពលរដ្ឋ ១១នាក់ ដែលត្រូវបានចោទប្រកាន់ថា ធ្វើចារកម្មឲ្យប៉ាគីស្ថាន បន្ទាប់ពីប្រទេសទាំង២ មានជម្លោះធ្ងន់ធ្ងរបំផុតជាលើកដំបូង ក្នុងរយៈពេលជាច្រើនទសវត្សរ៍។

គួររំលឹកថា យ៉ាងហោចណាស់មនុស្ស ៦០នាក់ បានបាត់បង់ជីវិត នៅក្នុងការប្រយុទ្ធគ្នា កាលពីដើមខែឧសភា ដែលបង្កឡើងដោយការវាយប្រហារកាលពីថ្ងៃទី២២ ខែមេសា លើអ្នកទេសចរ នៅតំបន់កាស្មៀរ (Kashmir) គ្រប់គ្រងដោយឥណ្ឌា ជាហេតុការណ៍ដែលទីក្រុងញូវដេលី បានចោទប្រកាន់ទីក្រុងអ៊ីស្លាម៉ាបាដថា បានផ្ដល់គាំទ្រ តែប៉ាគីស្ថានបដិសេធការចោទប្រកាន់នោះ។

តំបន់កាស្មៀរដែលមានប្រជាជនកាន់សាសនាឥស្លាមដោយភាគច្រើន ត្រូវបានអះអាងសិទ្ធិគ្រប់គ្រងទាំងស្រុងដោយប្រទេសជិតខាងទាំង២ ដែលបានធ្វើសង្គ្រាមជាមួយគ្នាជាច្រើនលើក នៅតំបន់ដែនដីភ្នំហិមាល័យមួយនេះ ចាប់តាំងពីប្រទេសទាំង២ ទទួលបានឯករាជ្យពីចក្រភពអង់គ្លេសឆ្នាំ១៩៤៧។

កាលពីថ្ងៃចន្ទ (ទី១៩ ខែឧសភា) ទូរទស្សន៍ NDTV បានរាយការណ៍ថា អាជ្ញាធរបានចាប់ខ្លួន «អ្នកស៊ើបការណ៍» ៩នាក់ ដែលត្រូវបានចោទប្រកាន់ពីបទចារកម្ម នៅភាគខាងជើងរដ្ឋ Haryana, Punjab និង Uttar Pradesh។ ចំណែកឯអគ្គស្នងការនគរបាលរដ្ឋ Punjab លោក Gaurav Yadav កាលពីថ្ងៃទី១៩ ខែឧសភា បាននិយាយថា ក្រុមរបស់លោកបានចាប់ខ្លួនមនុស្ស ២នាក់ «ពាក់ព័ន្ធនឹងការលេចធ្លាយព័ត៌មានយោធាដ៏រសើប»។

នគរបាលបានទទួលបាន «ព័ត៌មានស៊ើបការណ៍សម្ងាត់ដ៏គួរឲ្យទុកចិត្តបាន» ដែលបុរសទាំង ២នាក់ បានចូលរួម «ចែករំលែកព័ត៌មានលម្អិតសម្ងាត់» ទាក់ទងនឹងការវាយប្រហាររបស់ទីក្រុងញូវដេលីចូលជ្រៅទៅក្នុងដែនដីប៉ាគីស្ថាន នៅយប់ ចន្លោះថ្ងៃទី៦ និងទី៧ ខែឧសភា។

លោក Yadav បានបន្ថែមថា ការស៊ើបអង្កេតបឋមបង្ហាញថា ពួកគេកំពុងមានទំនាក់ទំនងផ្ទាល់ជាមួយអ្នកគ្រប់គ្រងពីទីភ្នាក់ងារស៊ើបការណ៍សម្ងាត់អន្តរសេវាកម្មរបស់ប៉ាគីស្ថាន ហើយបានបញ្ជូនព័ត៌មានសំខាន់ៗទាក់ទងនឹងកងកម្លាំងប្រដាប់អាវុធឥណ្ឌា។ ដោយឡែកនៅរដ្ឋ Haryana នគរបាលបានចាប់ខ្លួនអ្នកសរសេរប្លុកទេសចរណ៍ម្នាក់កាលពីសប្តាហ៍មុន ជុំវិញការចោទប្រកាន់ស្រដៀងគ្នាដែរ៕