សហភាពអឺរ៉ុប បាននិយាយកាលពីថ្ងៃចន្ទថា ខ្លួននឹងផ្តល់ជំនួយចំនួន ៤ ពាន់លានអឺរ៉ូ (៤,៥ ពាន់លានដុល្លារ) ដល់អេហ្ស៊ីប ក្នុងទម្រង់ជាប្រាក់កម្ចី ដើម្បីអនុញ្ញាតឲ្យទីក្រុងគែរបំពេញតម្រូវការផ្នែកហិរញ្ញវត្ថុរបស់ខ្លួន រួមជាមួយនឹងកម្មវិធីប្រាក់កម្ចីរបស់មូលនិធិរូបិយវត្ថុអន្តរជាតិ (IMF)ដែលមានរួចហើយ។

កិច្ចព្រមព្រៀងបណ្ដោះអាសន្នស្តីពីជំនួយរបស់សហភាពអឺរ៉ុប ត្រូវបានឈានដល់រវាងក្រុមប្រឹក្សាសហភាពអឺរ៉ុប ដែលតំណាងឲ្យរដ្ឋជាសមាជិករបស់ប្លុក និងសភាអឺរ៉ុប។ ស្ថាប័នទាំងពីរ ត្រូវតែធ្វើកិច្ចព្រមព្រៀងជាផ្លូវការ មុនពេលការបញ្ចេញប្រាក់ដំបូង អាចត្រូវបានប្រកាស។ កាលពីដើមឆ្នាំមុន  មូលនិធិរូបិយវត្ថុអន្តរជាតិ (IMF) បានពង្រីកកញ្ចប់ប្រាក់កម្ចីឆ្នាំ ២០២២ សម្រាប់អេហ្ស៊ីបពី ៣ ពាន់លានដុល្លារទៅ ៨ ពាន់លានដុល្លារ ដើម្បីជួយប្រទេសនេះ គ្រប់គ្រងបញ្ហាប្រឈមសេដ្ឋកិច្ច ចំពេលមានអស្ថិរភាពក្នុងតំបន់។

ក្រុមប្រឹក្សាសហភាពអឺរ៉ុប បាននិយាយថា ការដំឡើងប្រាក់កម្ចីអឺរ៉ុបសម្រាប់អេហ្ស៊ីប នឹងត្រូវបាន «ផ្សារភ្ជាប់ទៅនឹងវឌ្ឍនភាពគួរឲ្យពេញចិត្ត ជាមួយនឹងការអនុវត្តកម្មវិធីទាំងពីររបស់ IMF»។

សហភាពអឺរ៉ុប និងទីក្រុងគែរ ក្នុងខែមីនា ឆ្នាំ ២០២៤ បានចុះហត្ថលេខាលើ «ភាពជាដៃគូយុទ្ធសាស្ត្រ» ដែលរួមបញ្ចូលជំនួយហិរញ្ញវត្ថុចំនួន ៥ពាន់លានអឺរ៉ូ ដែលក្នុងនោះមួយពាន់លានដំបូង ត្រូវបានផ្តល់ឲ្យ ក្នុងខែបន្ទាប់។