អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បាននិយាយនៅថ្ងៃអង្គារនេះថា អ៊ីរ៉ង់បានទទួល និងកំពុងពិនិត្យមើលសំណើសម្រាប់កិច្ចចរចានុយក្លេអ៊ែរជុំទី៥ ជាមួយសហរដ្ឋអាមេរិក។

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីសប្តាហ៍មុនថា កិច្ចព្រមព្រៀងនុយក្លេអ៊ែរថ្មី ជាមួយក្រុងតេអេរ៉ង់ កំពុងខិតជិតមកដល់ ខណៈដែលសំណើចុងក្រោយត្រូវបានផ្តល់ ដោយបន្ថែមថា ប្រជាជនអ៊ីរ៉ង់ ត្រូវ «ផ្លាស់ទីឲ្យបានលឿន បើមិនដូច្នេះទេ អ្វីដែលអាក្រក់នឹងកើតឡើង»។

លោកប្រធានាធិបតីអាមេរិក បានព្រមានម្តងហើយម្តងទៀតថា អ៊ីរ៉ង់នឹងត្រូវទម្លាក់គ្រាប់បែក ហើយប្រឈមមុខនឹងទណ្ឌកម្មធ្ងន់ធ្ងរ ប្រសិនបើខ្លួនមិនឈានដល់ការសម្របសម្រួល ដើម្បីដោះស្រាយកម្មវិធីនុយក្លេអ៊ែរ ដែលមានជម្លោះរបស់ខ្លួន។

មន្ត្រីអ៊ីរ៉ង់ម្នាក់ បានប្រាប់សារព័ត៌មារ៉យទ័រថា កិច្ចចរចាបន្ទាប់ អាចប្រព្រឹត្ត ទៅនៅចុងសប្តាហ៍ នៅទីក្រុងរ៉ូមនៃប្រទេសអ៊ីតាលី បើទោះបីជា បញ្ហានេះ នៅតែត្រូវបញ្ជាក់ក៏ដោយ។

ទោះបីជាអ្នកនាំពាក្យក្រសួងការបរទេសម្នាក់ បាននិយាយថា ទីក្រុងតេអេរ៉ង់ នឹងបន្តការចរចា ប៉ុន្តែកិច្ចចរចា នៅតែស្ថិតក្នុងភាពរង្គោះរង្គើ ខណៈដែលទាំងអ៊ីរ៉ង់ និងសហរដ្ឋអាមេរិក បានប៉ះទង្គិចគ្នាលើបញ្ហានៃចម្រាញ់សារធាតុអ៊ុយរ៉ានីញ៉ូមដែលមានកម្រិតផលិតអាវុធនុយក្លេអ៊ែរបាន។

លោក Majid Takht-Ravanchi អនុរដ្ឋមន្ត្រីការបរទេសអ៊ីរ៉ង់ម្នាក់ទៀត បាននិយាយកាលពីថ្ងៃចន្ទថា កិច្ចពិភាក្សា នឹងបរាជ័យ ប្រសិនបើក្រុងវ៉ាស៊ីនតោនទទូចថា ទីក្រុងតេអេរ៉ង់ ត្រូវតែជៀសវាងការចម្រាញ់សារធាតុអ៊ុយរ៉ានីញ៉ូម ដែលសហរដ្ឋអាមេរិកនិយាយថា ជាផ្លូវដែលអាចធ្វើទៅបាន ក្នុងការផលិតគ្រាប់បែកនុយក្លេអ៊ែរ។

ទីក្រុងតេអេរ៉ង់ និយាយថា កម្មវិធីថាមពលនុយក្លេអ៊ែររបស់ខ្លួន មានគោលបំណងសន្តិភាពទាំងស្រុង។