រដ្ឋមន្ត្រីការពារជាតិអាល្លឺម៉ង់ លោក Boris Pistorius នៅថ្ងៃអង្គារ (ទី២០ ខែឧសភា) នេះ បានចោទប្រកាន់ លោកប្រធានាធិបតី Vladimir Putin ថា មិនចាប់អារម្មណ៍យ៉ាងពិតប្រាកដ ចំពោះដំណើរការសន្តិភាពនៅក្នុងប្រទេសអ៊ុយក្រែននោះឡើយ ដោយនិយាយថា មេដឹកនាំរុស្ស៊ីគ្រាន់តែប្រឡែងលេងជាមួយពេលវេលាប៉ុណ្ណោះ ពោលគឺលោកគ្មានចេតនាច្បាស់លាស់នោះឡើយ សម្រាប់កិច្ចពិភាក្សានានា ជាមួយសហរដ្ឋអាមេរិក។

លោក Pistorius បានបន្ថែមថា អឺរ៉ុបចាំបាច់ត្រូវបង្កើនសម្ពាធលើរុស្ស៊ី ដោយដាក់ទណ្ឌកម្មបន្ថែមទៀត ជាពិសេសលើការលក់ថាមពលរបស់ប្រទេសនេះ។

នៅមុនកិច្ចប្រជុំរដ្ឋមន្ត្រីការពារជាតិ និងកិច្ចការបរទេសសហភាពអឺរ៉ុប (EU) នៅទីក្រុងប្រ៊ុចសែល ប្រទេសបែលហ្ស៊ិក លោក Pistorius បានប្រាប់ថា៖ «យើងបានមើលឃើញការវាយប្រហារដ៏ធំ (របស់រុស្ស៊ី) ម្តងទៀត ក្នុងរយៈពេលប៉ុន្មានថ្ងៃថ្មីៗនេះ។ ទាំងនេះបង្ហាញយ៉ាងច្បាស់ក្រឡែតពីការនិយាយឲ្យតែរួចពីមាត់ (ចំពោះដំណើរការសន្តិភាព) ដែលយើងធ្លាប់បានឮជាយូរមកហើយ។ លោក Putin ច្បាស់ណាស់កំពុងប្រឡែងលេងជាមួយពេលវេលា ពោលគឺជារឿងគួរឲ្យសោកស្ដាយ ដែលយើងត្រូវនិយាយថា លោក Putin ពិតជាមិនចាប់អារម្មណ៍នឹងសន្តិភាពអ្វីទាំងអស់»។

រុស្ស៊ី និងអ៊ុយក្រែន គ្រោងនឹងចាប់ផ្តើមកិច្ចចរចា បន្ទាប់ពីលោក Putin បានជជែកជាមួយប្រធានាធិបតីអាមេរិក លោក Donald Trump កាលពីថ្ងៃចន្ទ ប៉ុន្តែលោក Putin បាននិយាយថា ដំណើរការនេះនឹងត្រូវការពេលវេលា៕