ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas នៅថ្ងៃអង្គារ (ទី២០ ខែឧសភា) នេះ បាននិយាយថា លោកស្រីសង្ឃឹមថា រដ្ឋមន្ត្រីដែលជួបប្រជុំគ្នា នៅទីក្រុងប្រ៊ុចសែល ប្រទេសបែលហ្ស៊ិក នឹងឈានដល់កិច្ចព្រមព្រៀង ស្តីពីការដកទណ្ឌកម្មសេដ្ឋកិច្ច លើប្រទេសស៊ីរី។

លោកស្រី Kallas បានប្រាប់អ្នកសារព័ត៌មានមុនកិច្ចប្រជុំនេះថា៖ «សម្រាប់ប្រទេសស៊ីរី ខ្ញុំសង្ឃឹមថា យើងនឹងព្រមព្រៀងដកទណ្ឌកម្មសេដ្ឋកិច្ច នៅថ្ងៃនេះ»។ លោកស្រីបានព្រមានថា អឺរ៉ុបត្រូវផ្តល់ឱកាសឲ្យស៊ីរីមានស្ថិរភាព ឬបើមិនដូច្នោះទេ ប្រឈមនឹងហានិភ័យឲ្យប្រទេសនេះបញ្ចប់ក្នុងស្ថានភាពដូចនៅអាហ្វហ្គានីស្ថាន។

ក្រុមមន្ត្រីបានលើកឡើងថា បណ្ដារដ្ឋមន្ត្រីកំពុងពិចារណាលើការសម្រេចផ្នែកនយោបាយ ក្នុងការដកទណ្ឌកម្មសេដ្ឋកិច្ច ខណៈដែលបន្តរក្សាទណ្ឌកម្ម ទាក់ទងនឹងរបបរបស់ប្រធានាធិបតីដែលត្រូវបានទម្លាក់ចេញពីអំណាច គឺលោក Bashar al-Assad និងដាក់ចេញនូវវិធានការប្រឆាំងនឹងអ្នករំលោភសិទ្ធិមនុស្ស។

អ្នកការទូតបានប្រាប់ថា នៅព្រឹកថ្ងៃអង្គារនេះ ឯកអគ្គរដ្ឋទូតបានឈានដល់កិច្ចព្រមព្រៀងបឋមមួយ ស្តីពីកិច្ចព្រមព្រៀងនយោបាយ ដើម្បីដកទណ្ឌកម្មសេដ្ឋកិច្ច ដោយកត់សម្គាល់ថា ការសម្រេចចុងក្រោយ គឺអាស្រ័យលើរដ្ឋមន្ត្រី។

លោកស្រី Kallas បាននិយាយថា៖ «វាគឺច្បាស់ណាស់ថា យើងចង់ឲ្យទីនោះមានការងារ និងឱកាសចិញ្ចឹមជីវិតដ៏ល្អប្រសើរ សម្រាប់ប្រជាជន (នៅក្នុងប្រទេសស៊ីរី) ដើម្បីឲ្យប្រទេសនេះនឹងកាន់តែមានស្ថិរភាពបន្ថែមទៀត»។

គួរបញ្ជាក់ថា ការផ្លាស់ប្តូរគោលនយោបាយរបស់ EU នេះ កើតមានឡើងបន្ទាប់ពីប្រធានាធិបតីអាមេរិក លោក Donald Trump បាននិយាយកាលពីសប្តាហ៍មុនថា លោកនឹងបញ្ជាឲ្យដកទណ្ឌកម្មលើប្រទេសស៊ីរី៕