អង្គការសហប្រជាជាតិនិយាយថា ពុំទាន់មានជំនួយណាមួយត្រូវបានចែកចាយក្នុងតំបន់ហ្កាហ្សាទេ ទោះរថយន្តជំនួយចាប់ផ្តើមឆ្លងកាត់ព្រំដែនបន្ទាប់ពីការបិទផ្លូវអស់រយៈពេល១១សប្តាហ៍ក៏ដោយ។

មន្ត្រីអ៊ីស្រាអែលនិយាយថា រថយន្តដឹកទំនិញចំនួន៩៣ គ្រឿងបានចូលក្នុងតំបន់ហ្កាហ្សាកាលពីថ្ងៃអង្គារ២០ឧសភា ដោយដឹកជំនួយរួមមានម្សៅ អាហារសម្រាប់ទារក ឧបករណ៍វេជ្ជសាស្ត្រ និងឱសថ។

ប៉ុន្តែអង្គការសហប្រជាជាតិបាននិយាយថា ទោះមានរថយន្តជំនួយទៅដល់ភាគីប៉ាឡេស្ទីននៃច្រកព្រំដែន Kerem Shalom ក៏ដោយ រហូតមកដល់ពេលនេះមិនមានជំនួយត្រូវបានចែកចាយទេ។

អ្នកនាំពាក្យអង្គការនេះលោក Stephane Dujarric បាននិយាយថា ក្រុមមួយបានរង់ចាំជាច្រើនម៉ោង សម្រាប់អ៊ីស្រាអែល ដើម្បីអនុញ្ញាតឱ្យពួកគេចូលទៅកាន់តំបន់នេះ ប៉ុន្តែគួរឲ្យស្ដាយ ពួកគេមិនអាចនាំយកការផ្គត់ផ្គង់ទាំងនោះចូលទៅក្នុងឃ្លាំងរបស់អង្គការសហប្រជាជាតិបានទេ ។

អ៊ីស្រាអែលបានយល់ព្រមកាលពីថ្ងៃអាទិត្យអនុញ្ញាតឱ្យបរិមាណអាហារមូលដ្ឋាន ចូលទៅហ្កាហ្សាជាទីដែលក្រុមអ្នកជំនាញពិភពលោកបានព្រមានអំពីទុរ្ភិក្សដែលជិតកើតមាន។ប៉ុន្តែសម្ពាធអន្តរជាតិលើអ៊ីស្រាអែលបានបន្តកើនឡើង។

អង់គ្លេសនិយាយថា ខ្លួននឹងផ្អាកកិច្ចពិភាក្សាពាណិជ្ជកម្មលើអ្វីដែលខ្លួនបានហៅថាជាការកើនឡើងផ្នែកយោធាមិនសមហេតុផលរបស់អ៊ីស្រាអែល នៅហ្កាហ្សា ដោយលោកនាយករដ្ឋមន្ត្រី Sir Keir Starmer បានពណ៌នាស្ថានភាពនេះថាមិនអាចទទួលយកបាន។ 

ទន្ទឹមនឹងនេះដែរ ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas និយាយថា ប្លុកនេះនឹងពិនិត្យមើលឡើងវិញនូវកិច្ចព្រមព្រៀងពាណិជ្ជកម្មរបស់ខ្លួនជាមួយអ៊ីស្រាអែល ដោយគិតពីសកម្មភាពរបស់ខ្លួនក្នុងតំបន់ហ្កាហ្សា។ស្ថាប័នអង្គការសហប្រជាជាតិប៉ាន់ប្រមាណថា រថយន្តដឹកជំនួយ៦០០គ្រឿងក្នុងមួយថ្ងៃ ទើបអាចបំពេញតម្រូវការបាន ដើម្បីចាប់ផ្តើមដោះស្រាយវិបត្តិមនុស្សធម៌រ៉ាំរ៉ៃរបស់ហ្កាហ្សា៕