សម្រាប់អ៊ុយក្រែន និងសម្ព័ន្ធមិត្ត ដែលបានចំណាយពេលច្រើនខែយកឈ្នះចិត្តលោកប្រធានាធិបតីអាមេរិក Donald Trump ឱ្យដើរតាមបុព្វហេតុរបស់ពួកគេនៅក្នុងសង្រ្គាមដែលចាប់ផ្តើមដោយរុស្ស៊ីនោះ ពេលនេះហាក់ដូចជាត្រូវត្រលប់ទៅចំណុចចាប់ផ្ដើមវិញ។

នៅក្នុងកិច្ចសន្ទនា ២ម៉ោងជាមួយមេដឹកនាំរុស្ស៊ី លោក Vladimir Putin កាលពីល្ងាចថ្ងៃចន្ទសប្ដាហ៍នេះ លោក Trump បានទម្លាក់ចោលនូវការទទូចពីមុនរបស់លោកលើបទឈប់បាញ់គ្មានលក្ខខណ្ឌ ៣០ថ្ងៃ ដែលលោកសង្ឃឹមថា នឹងចាប់ផ្តើមនូវអ្វីដែលបានសន្យាស្ដីពីកិច្ចចរចាសន្តិភាពដ៏វែងឆ្ងាយ។ លោក Trump ក៏ផ្តល់សញ្ញាថា សង្រ្គាមដែលលោកធ្លាប់សន្យាថានឹងបញ្ចប់ក្នុងពេល ២៤ម៉ោងនោះ គឺមិនមែនជាកិច្ចការសម្រាប់លោកដោះស្រាយទៀតទេ នៅក្នុងសារមួយដែលធ្វើឱ្យអ៊ុយក្រែន ងាយរងគ្រោះ និងសម្ព័ន្ធមិត្តរបស់ខ្លួនព្រួយបារម្ភ។

ទាំងអស់នេះជាការវាយប្រហារដ៏ធំមួយផ្សេងទៀតចំពោះទីក្រុងគីវ ដែលមិនដល់ ៣ខែផងបន្ទាប់ពីសាធារណៈជនរបស់លោក Trump បានខកចិត្តចំពោះសន្យាគ្មានរូបរាង រួមជាមួយនឹងលោកប្រធានាធិបតីអ៊ុយក្រែន Volodymyr Zelenskiy។ ចាប់តាំងពីពេលនោះមក មេដឹកនាំអឺរ៉ុប បានព្យាយាមជួសជុលទំនាក់ទំនង និងទទួលបានគំនិតផ្តួចផ្តើមឡើងវិញ។

ប៉ុន្មានសប្តាហ៍មុនការសន្ទនាតាមទូរសព្ទនោះ លោក Trump បានគំរាមថានឹងដាក់ទណ្ឌកម្មកាន់តែតឹងលើរុស្ស៊ី ប្រសិនបើមិនបង្ហាញពីវឌ្ឍនភាពឆ្ពោះទៅរកសន្តិភាព។ ប៉ុន្តែវិធីសាស្រ្ត "តឹងរ៉ឹង" នោះបានបាត់បង់ហើយសម្រាប់ពេលនេះ ជំនួសមកវិញដោយ "ការលួងលោម" នៃភាពជាដៃគូសេដ្ឋកិច្ចជាមួយអាមេរិកទៅវិញ ប្រសិនបើ និងនៅពេលដែលសង្រ្គាមបានបញ្ចប់។

នៅពេលលោក Trump បានសង្ខេបប្រាប់មេដឹកនាំអឺរ៉ុប រួមទាំងលោក Zelenskiy ផងដែរ ក្រោយការពិភាក្សាតាមទូរសព្ទជាមួយលោក Putin បញ្ចប់ មនុស្សម្នាក់ដែលដឹងពីការពិភាក្សាបានពិពណ៌នាប្រតិកម្មចំពោះជំហរប្រែប្រួលរបស់លោក Trump ថាជា "រឿងដ៏ភ្ញាក់ផ្អើល"៕