ព្រឹទ្ធសមាជិកអាមេរិក លោក Gary Peters បាននិយាយក្នុងអំឡុងសវនាការសភាកាលថ្ងៃអង្គារ (២០ ឧសភា) ថា ការប្រើប្រាស់មូលដ្ឋានទ័ពជើងទឹកនៅគុយបា ឈ្មោះ គ័នតាណាមូ បេ (Guantanamo Bay) របស់លោកប្រធានាធិបតីអាមេរិក Donald Trump ដើម្បីឃុំឃាំងជនអន្តោប្រវេសន៍ ហាក់ដូចជាត្រូវចំណាយប្រាក់ ១០០.០០០ដុល្លារ ក្នុងមួយថ្ងៃសម្រាប់អ្នកជាប់ឃុំម្នាក់ៗ។

លោក Peters សមាជិកបក្សប្រជាធិបតេយ្យជាន់ខ្ពស់នៃគណៈកម្មាធិការសន្តិសុខមាតុភូមិ និងកិច្ចការរដ្ឋាភិបាលរបស់ព្រឹទ្ធសភា បានចោទសួររដ្ឋមន្ត្រីសន្តិសុខមាតុភូមិ លោកស្រី Kristi Noem ពីការចំណាយខ្ពស់ខ្លាំងដែលលើសពីតួលេខ ១៦៥ដុល្លារក្នុងមួយថ្ងៃ នៅមន្ទីរឃុំឃាំងអន្តោប្រវេសន៍ធម្មតារបស់អាមេរិក។ លោក Peters ក៏ចោទសួរថា ហេតុអ្វីបានជាអ្នកជាប់ឃុំ ត្រូវបញ្ជូនទៅមូលដ្ឋានទ័ពជើងទឹកអាមេរិកក្នុងប្រទេសគុយបាមួយនោះ ប៉ុន្តែបែរជាពលរដ្ឋបង់ពន្ធអាមេរិកជាអ្នកចំណាយទៅវិញ។

លោក Peters បាននិយាយថា "អាមេរិកចំណាយ ១០០.០០០ដុល្លារក្នុងមួយថ្ងៃ ដើម្បីឃុំមនុស្សម្នាក់នៅមូលដ្ឋាន Guantanamo ក្នុងគុយបា ឬក៏អាចបញ្ជូនពួកគេមកវិញ ឃុំនៅសហរដ្ឋអាមេរិក ក្នុងតម្លៃត្រឹម ១៦៥ដុល្លារក្នុងមួយថ្ងៃ"។

សេតវិមានស្នើបង្កើនថវិកាយ៉ាងច្រើនសម្រាប់ការអនុវត្តច្បាប់អន្តោប្រវេសន៍ ខណៈខ្លួនព្យាយាមសម្រេចគោលដៅរបស់លោក Trump ក្នុងការនិរទេសទ្រង់ទ្រាយធំ។ ក្នុងខែនេះ រដ្ឋបាលបានស្នើឱ្យសភាអនុម័តថវិកាបន្ថែម ៤៤ពាន់លានដុល្លារ សម្រាប់ក្រសួងសន្តិសុខមាតុភូមិក្នុងឆ្នាំសារពើពន្ធ ២០២៦ ដែលចាប់ផ្តើមនៅថ្ងៃទី០១ ខែតុលា។ លោកស្រី Noem ដែលបង្ហាញខ្លួននៅមុខគណៈកម្មាធិការសភាដើម្បីការពារសំណើថវិកានោះ បាននិយាយថា លោកស្រីមិនបានដឹងពីការចំណាយប្រចាំថ្ងៃសម្រាប់ជនអន្តោប្រវេសន៍នៅមន្ទីរ Guantanamo Bay នោះទេ៕