មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បាននិយាយថា លោកមិនរំពឹងថា ការចរចាជាមួយសហរដ្ឋអាមេរិក ជុំវិញកម្មវិធីនុយក្លេអ៊ែររបស់ទីក្រុង តេអេរ៉ង់ នឹងឈានដល់ការសម្រេចបាននោះទេ ខណៈទីក្រុងវ៉ាស៊ីនតោន ពង្រឹងលក្ខខណ្ឌរបស់ខ្លួនសម្រាប់កិច្ចព្រមព្រៀងមួយ។

លោកបាននិយាយនៅលើគេហទំព័ររបស់លោកថា   ក្នុងអំឡុងពេលអតីតប្រធានាធិបតីលោក Ebrahim Raisi មានការចរចាដោយប្រយោលដែលមិនមានលទ្ធផលអ្វីនោះទេ ហើយឥឡូវនេះពួកលោកក៏សង្ស័យចំពោះការឈានដល់ការសន្និដ្ឋានមួយ ហើយពួកលោកមិនដឹងថានឹងមានអ្វីកើតឡើងនោះទេ ។

ថ្លែងទៅកាន់ក្រុមអ្នកចរចាជាមួយអាមេរិក លោក Khamenei បានហៅការទាមទាររបស់អាមេរិកដែលថាអ៊ីរ៉ង់មិនអាចចម្រាញ់សារធាតុអ៊ុយរ៉ានីញ៉ូម ថាជាកំហុសធំ ដោយនិយាយថា ទីក្រុងតេអេរ៉ង់ នឹងមិនរង់ចាំការអនុញ្ញាតពីអាមេរិកឡើយ។

មន្ត្រីអាមេរិកបានបញ្ជូនសញ្ញាចម្រុះអំពីថាតើពួកគេនឹងអនុញ្ញាតឱ្យអ៊ីរ៉ង់បង្កើនការចម្រាញ់សារធាតុអ៊ុយរ៉ានីញ៉ូមក្រោមកិច្ចព្រមព្រៀងនុយក្លេអ៊ែរ ឬយ៉ាងណា។ អ៊ុយរ៉ានីញ៉ូម គឺជាឥន្ធនៈនុយក្លេអ៊ែរ ដែលអាចប្រើសម្រាប់ផលិតគ្រាប់បែក ប្រសិនបើត្រូវបានចម្រាញ់ឈានដល់កម្រិតខ្ពស់។

ប្រធានាធិបតីអាមេរិក លោក Donald Trump បានគំរាមវាយប្រហារប្រទេសអ៊ីរ៉ង់ ប្រសិនបើខ្លួនមិនយល់ព្រមលើកិច្ចព្រមព្រៀងនុយក្លេអ៊ែរ ប៉ុន្តែលោកមិនបានបដិសេធដាច់ខាតនូវសិទ្ធិរបស់ខ្លួនក្នុងការចម្រាញ់សារធាតុអ៊ុយរ៉ានីញ៉ូមទេ នៅពេលនិយាយឡើងវិញនូវការគំរាមកំហែងនោះ ក្នុងអំឡុងពេលធ្វើដំណើរទៅកាន់មជ្ឈិមបូព៌ាកាលពីសប្តាហ៍មុន៕