ការសិក្សាមួយបានរកឃើញថា តួលេខជិត ៦០% នៃស្រុករបស់ឥណ្ឌា ដែលជាជម្រករបស់ប្រជាជនចំនួន ៣ ភាគ ៤ ប្រឈមនឹងហានិភ័យ "ខ្ពស់" ទៅ "ខ្ពស់ខ្លាំង" ពីកម្ដៅដ៏គ្រោះថ្នាក់ ជាមួយនឹងការកើនឡើងនៃសីតុណ្ហភាពពេលយប់ និងសំណើមខ្ពស់ ដែលធ្វើអោយប៉ះពាល់ដល់សុខភាព។

របាយការណ៍ដែលចេញផ្សាយកាលពីថ្ងៃអង្គារ (២០ ឧសភា) ដោយក្រុមប្រឹក្សាថាមពល បរិស្ថាន និងទឹក (CEEW) មានមូលដ្ឋាននៅទីក្រុងញូវដេលី បានវិភាគទិន្នន័យអាកាសធាតុ សុខភាព និងហេដ្ឋារចនាសម្ព័ន្ធ ដើម្បីគណនាពិន្ទុហានិភ័យកម្ដៅ។

ការសិក្សារកឃើញថា "ប្រហែល ៥៧% នៃស្រុកឥណ្ឌា ដែលជាជម្រកសម្រាប់ ៧៦% នៃចំនួនប្រជាជនសរុបរបស់ឥណ្ឌាទាំងមូល បច្ចុប្បន្នមានហានិភ័យ "ខ្ពស់" ទៅ "ខ្ពស់ខ្លាំង" នៃកម្ដៅដ៏អាក្រក់ ជាមួយនឹងហានិភ័យកម្ដៅនៅក្នុងរដ្ឋធានីញូវដែលី ស្ថិតក្នុងចំណោមខ្ពស់បំផុត។

ការសិក្សានេះកើតឡើង ខណៈផ្នែកខ្លះនៃភាគខាងជើងឥណ្ឌា បន្តជួបប្រទះនឹងរលកកម្ដៅ និងស្ថានភាពរលកកម្ដៅធ្ងន់ធ្ងរ។ មនុស្សរាប់ពាន់លាននាក់នៅទូទាំងអាស៊ីខាងត្បូង កំពុងប្រឈមមុខនឹងសីតុណ្ហភាពកើនឡើងរៀងរាល់ឆ្នាំ នៅក្នុងនិន្នាការមួយដែលអ្នកវិទ្យាសាស្ត្រនិយាយថា កាន់តែអាក្រក់ទៅៗដោយបម្រែបម្រួលអាកាសធាតុ ជំរុញដោយមនុស្ស។

ការសិក្សាក៏បង្ហាញពីការកើនឡើងនៃសំណើម នៅទូទាំងភាគខាងជើងឥណ្ឌា រួមទាំងតំបន់ដែលធ្លាប់តែស្ងួតហួតហែង ដែលធ្វើអោយភាពតានតឹងកម្ដៅលើរាងកាយមនុស្សកាន់តែអាក្រក់ ដោយសារបន្ថយដំណើរការបែកញើស និងធ្វើឱ្យពិបាកបញ្ចេញកម្ដៅពីខ្លួនប្រាណ នៅពេលសីតុណ្ហភាពកើនឡើង៕