ប្រមុខអង្គការសហប្រជាជាតិបានព្រមានកាលពីថ្ងៃអង្គារសប្ដាហ៍នេះថា ទារករហូតដល់១៤.០០០នាក់ នៅតំបន់ហ្កាហ្សាអាចស្លាប់ក្នុងរយៈពេល ៤៨ ម៉ោងក្រោយ ប្រសិនបើជំនួយមនុស្សធម៌មិនទៅដល់ដៃពួកគេភ្លាមៗ។

ក្រុមសន្តិសុខស្បៀងនិយាយថា កុមារជាង ៩៣ ភាគរយនៅហ្កាហ្សា និងប្រហែល៩៣០.០០០នាក់ កំពុងប្រឈមនឹងគ្រោះទុរ្ភិក្ស។

ក្រុមអាជ្ញាធរនៅតំបន់ហ្កាហ្សានិយាយថា គោលនយោបាយអត់ឃ្លាន របស់អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់៣២៦ នាក់ចាប់តាំងពីថ្ងៃទី ២ ខែមីនា។

ថ្លែងទៅកាន់កម្មវិធី BBC Radio 4's Today ប្រធានផ្នែកមនុស្សធម៌របស់អង្គការសហប្រជាជាតិ លោក Tom Fletcher បានសង្កត់ធ្ងន់លើភាពបន្ទាន់នៃស្ថានភាពនេះ ដោយនិយាយថា រថយន្តដឹកជំនួយរាប់ពាន់គ្រឿងដែលផ្ទុកដោយអាហារទារក និងអាហារូបត្ថម្ភបានត្រៀមរួចជាស្រេចដើម្បីចូលទៅក្នុងដែនដីហ្កាហ្សា ប៉ុន្តែនៅតែជាប់គាំងនៅព្រំដែន។

លោក Fletcher បាននិយាយថា នេះមិនមែនជាអាហារដែលក្រុមហាម៉ាសនឹងលួចនោះទេ។ជំនួយប្រឈមនឹងការលួច។ពួកលោកប្រឈមនឹងការប៉ះពាល់ ជាផ្នែកមួយនៃការវាយលុករបស់យោធាអ៊ីស្រាអែល។ពួកលោកប្រថុយប្រថានគ្រប់បែបយ៉ាងដោយព្យាយាមយកអាហារទារកនោះទៅឲ្យដល់ដៃម្តាយទាំងនោះ ដែលមិនអាចចិញ្ចឹមកូនបាននៅពេលនេះ ដោយសារពួកគេខ្វះអាហារូបត្ថម្ភ។អ៊ីស្រាអែលបានប្រាប់អង្គការសហប្រជាជាតិកាលពីថ្ងៃអង្គារថា ខ្លួននឹងអនុញ្ញាតឱ្យមានរថយន្តដឹកទំនិញចំនួន ១០០ គ្រឿងផ្ទុកដោយជំនួយមនុស្សធម៌ មួយថ្ងៃបន្ទាប់ពីពួកលោកបាននិយាយថា ខ្លួនបានអនុញ្ញាតឱ្យរថយន្តជំនួយតែ ៩ គ្រឿងចូលទៅក្នុងតំបន់នេះជាលើកដំបូងក្នុងរយៈពេលជាង ៨០ថ្ងៃ៕