អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃអង្គារ បានសម្តែងក្តីសង្ឃឹមថា ការតែងតាំងនាយករដ្ឋមន្ត្រីថ្មីនៅក្នុងប្រទេសស៊ូដង់ នឹងជួយបង្កើតសន្តិភាព។

លោក Stephane Dujarric អ្នកនាំពាក្យរបស់លោក Guterres បាននិយាយនៅក្នុងសេចក្តីថ្លែងការណ៍មួយថា លោកអគ្គលេខាធិការ បានកត់សម្គាល់ពីក្រឹត្យមួយរបស់មេដឹកនាំប្រទេស ក្នុងការតែងតាំង លោក Kamil Idris ជានាយករដ្ឋមន្ត្រី។

សេចក្តីថ្លែងការណ៍បាននិយាយថា «លោកអគ្គលេខាធិការ សង្ឃឹមថាការតែងតាំងនេះនឹងបម្រើជាជំហានដំបូងឆ្ពោះទៅរកការពិគ្រោះយោបល់ ក្នុងគោលបំណងបង្កើតរដ្ឋាភិបាលក្រុមអ្នកជំនាញដែលមានមូលដ្ឋានដ៏ទូលំទូលាយ និងបង្កើតសន្តិភាព»។

លោក Guterres បានគូសបញ្ជាក់ថា កិច្ចខិតខំប្រឹងប្រែងឯកភាពគ្នាត្រូវតែជាអាទិភាព និងនាំទៅរកវឌ្ឍនភាពជាក់ស្តែងសម្រាប់ជាប្រយោជន៍ដល់ប្រជាជនស៊ូដង់ទាំងអស់ រួមទាំងគ្មានសំឡេងកាំភ្លើង ផ្តល់សេវាសំខាន់ៗដល់ប្រជាជន និងដាក់មូលដ្ឋានសម្រាប់ចក្ខុវិស័យរួមនៅពេលអនាគតរបស់ប្រទេសស៊ូដង់។

ប្រធានក្រុមប្រឹក្សាអធិបតេយ្យភាពបណ្តោះអាសន្ន លោក Abdel Fattah Al-Burhan ដែលជាមេបញ្ជាការកងទ័ព កាលពីថ្ងៃចន្ទបានចេញក្រឹត្យរដ្ឋធម្មនុញ្ញមួយ ដោយតែងតាំងលោក Kamil Idris ជានាយករដ្ឋមន្ត្រីថ្មី។ មុខតំណែងនាយករដ្ឋមន្ត្រី បាននៅទំនេរចាប់តាំងពីមេដឹកនាំស៊ីវិល លោក Abdalla Hamdok លាលែងពីតំណែងក្នុងខែមករា ឆ្នាំ២០២២ បន្ទាប់ពីរដ្ឋប្រហារយោធាដឹកនាំដោយ លោក Al-Burhan ក្នុងខែតុលា ឆ្នាំ២០២១។