ប្រមុខបញ្ជាការកងកម្លាំងការពារ IDF របស់អ៊ីស្រាអែល លោកឧត្តមសេនីយ៍ឯក Eyal Zamir បានព្រមាននៅក្នុងសេចក្តីថ្លែងការណ៍វីដេអូមួយកាលពីថ្ងៃអង្គារ (២០ ឧសភា) ថា យោធាអ៊ីស្រាអែល បានត្រៀមខ្លួនវាយដណ្តើមយកទឹកដីបន្ថែមទៀតនៅក្នុងតំបន់ហ្កាហ្សាស្ទ្រីប ប្រសិនបើក្រុមហាម៉ាស មិនព្រមដោះលែងចំណាប់ថ្នូរសេសសល់ ដែលកំពុងជាប់ឃុំទេនោះ។

លោក Zamir បានចេញឱសានវាទបែបនេះ បន្ទាប់ពីការវាយតម្លៃស្ថានភាព និងដំណើរចុះពិនិត្យនៅដែនដីហ្កាហ្សា ប៉ុន្មានថ្ងៃក្រោយយុទ្ធនាការវាយលុកថ្មីដ៏ធំមួយ ដែលតាមរយៈនោះ អ៊ីស្រាអែលព្យាយាមវាយប្រហារក្រុមហាម៉ាស និងដណ្តើមកាន់កាប់ និងគ្រប់គ្រងទឹកដី ខណៈជម្លៀសជនជាតិប៉ាឡេស្ទីនពីភាគខាងជើងហ្កាហ្សា ទៅកាន់ភាគខាងត្បូង។

ប្រតិបត្តិការយោធានេះត្រូវបានចាប់ផ្តើម ស្របពេលមានការចរចាក្នុងប្រទេសកាតា សម្រាប់កិច្ចព្រមព្រៀងបទឈប់បាញ់ និងដោះលែងចំណាប់ថ្នូរសេសសល់ ដែលបានចាប់ផ្តើមឡើងវិញកាលពីសប្តាហ៍មុន បន្ទាប់ពីការដោះលែងចំណាប់ថ្នូរជនជាតិអាមេរិក-អ៊ីស្រាអែល ឈ្មោះ Edan Alexander។

អ៊ីស្រាអែលធ្លាប់បានព្រមានរួចហើយថា ខ្លួននឹងបើកការវាយលុកទ្រង់ទ្រាយធំ ប្រសិនបើមិនមានកិច្ចព្រមព្រៀងណាមួយត្រូវឈានដល់ទេនោះ បន្ទាប់ពីការបញ្ចប់ដំណើរទស្សនកិច្ចរបស់លោកប្រធានាធិបតីអាមេរិក Donald Trump ទៅតំបន់មជ្ឈិមបូព៌ា កាលពីសប្តាហ៍មុន។ របាយការណ៍ដំបូងបង្ហាញថា ការចរចាថ្មីកំពុងដំណើរទៅក្នុងទិសដៅត្រឹមត្រូវ ប៉ុន្តែក៏នៅតែជាប់គាំងមិនទៅមុខទេក្នុងពេលប៉ុន្មានថ្ងៃថ្មីៗនេះ៕