ជនអន្តោប្រវេសន៍ម្នាក់ ដែលកំពុងរស់នៅរដ្ឋ Pennsylvania ក្នុងសហរដ្ឋអាមេរិក ឈ្មោះ Wendy Ortiz មានការភ្ញាក់ផ្អើលខ្លាំងដែលដឹងថាខ្លួនត្រូវបានពិន័យដោយអាជ្ញាធរអន្តោប្រវេសន៍របស់សហរដ្ឋអាមេរិក សម្រាប់ការរស់នៅប្រទេសនេះដោយខុសច្បាប់ ក្នុងចំនួនទឹកប្រាក់យ៉ាងខ្ពស់ខ្លាំងគឺ ១,៨លានដុល្លារ។

ក្នុងកិច្ចសម្ភាសន៍ឯកសារអន្តោប្រវេសន៍ អ្នកស្រី Ortiz វ័យ ៣២ឆ្នាំ ដែលជាបុគ្គលិកមានចំណូលទាបដោយរកបានត្រឹមតែ ១៣ដុល្លារប៉ុណ្ណោះក្នុងមួយម៉ោង បាននិយាយថា ខ្លួនរស់នៅអាមេរិកអស់មួយទសវត្សរ៍មកហើយ បន្ទាប់ពីភៀសខ្លួនពីប្រទេសអែលសាល់វ៉ាឌ័រ គេចពីភាពឃោរឃៅ និងការគម្រាមរបស់ក្រុមជនអន្ធពាល។ ប្រាក់ខែរបស់អ្នកស្រី ស្ទើរតែមិនគ្រប់សម្រាប់ថ្លៃជួលផ្ទះ និងការចំណាយផ្សេងទៀតផង ហើយការពិន័យជាង ១លានដុល្លារនោះ រុញឱ្យលោកស្រីស្ថិតក្នុងភាពទាល់ច្រក។

មន្រ្តជាន់ខ្ពស់ម្នាក់និយាយថា ក្នុងប៉ុន្មានសប្តាហ៍ចុងក្រោយនេះ ប្រធានាធិបតីអាមេរិក លោក Donald Trump បានចាប់ផ្តើមដំណើរការផែនការពិន័យជនអន្តោប្រវេសន៍ ដែលខកខានមិនចាកចេញពីសហរដ្ឋអាមេរិកបន្ទាប់ពីមានដីកានិរទេសចុងក្រោយ ដោយបានចេញសេចក្តីជូនដំណឹងដល់ជនអន្តោប្រវេសន៍ចំនួន ៤.៥០០នាក់ ជាមួយនឹងការពិន័យសរុបជាង ៥០០លានដុល្លារ។

ក្រុមមេធាវីអន្តោប្រវេសន៍ចំនួន ៨នាក់នៅទូទាំងប្រទេស បាននិយាយថា កូនក្តីរបស់ពួកគេត្រូវបានពិន័យជាទឹកប្រាក់ ចាប់ពីច្រើនពាន់ដុល្លារទៅដល់ជាង ១,៨លានដុល្លារ។ សេចក្ដីជូនដំណឹងនិយាយថា អ្នកទទួលបានឯកសារនេះ មានពេល ៣០ថ្ងៃដើម្បីតវ៉ា ទាំងជាលាយលក្ខណ៍អក្សរ ក្រោមសម្បថ និងបង្ហាញភស្តុតាងពីមូលហេតុដែលមិនគួរដាក់ពិន័យពួកគេ៕