រដ្ឋមន្ត្រីហិរញ្ញវត្ថុកាណាដា លោក Francois-Philippe Champagne កាលពីថ្ងៃអង្គារ (ទី២០ ខែឧសភា) បាននិយាយថា រដ្ឋមន្ត្រីហិរញ្ញវត្ថុមកពីប្រទេសប្រជាធិបតេយ្យឧស្សាហកម្មទាំង៧ (G7) នឹងព្យាយាមព្រមព្រៀងលើគោលនយោបាយនានា ដើម្បីស្ដារកំណើនសេដ្ឋកិច្ច និងស្ថិរភាពពិភពលោក ដោយលោកទទួលស្គាល់ថា ភាពតានតឹង ដោយអត្រាពន្ធថ្មីរបស់សហរដ្ឋអាមេរិក នឹងបន្តមាន។

លោក Champagne បានប្រាប់សន្និសីទសារព័ត៌មានមួយថា កិច្ចប្រជុំ ក្នុងរយៈពេល ២ថ្ងៃបន្ទាប់ នៅក្នុងទីក្រុងរមណីយដ្ឋានភ្នំ Banff ក្នុងខេត្ត Alberta នឹងនិយាយអំពី «ការត្រលប់ទៅរកមូលដ្ឋាន» ហើយនឹងរួមបញ្ចូលការពិភាក្សា អំពីសមត្ថភាពផលិតលើសកម្រិត ការអនុវត្តពាណិជ្ជកម្មមិនយុត្តិធម៌ និងឧក្រិដ្ឋកម្មហិរញ្ញវត្ថុ។ 

លោក Champagne បាននិយាយថា៖ «ខ្ញុំគិតថា ដើម្បីបម្រើដល់ប្រជាជនដែលយើងតំណាងឲ្យ បេសកកម្មរបស់យើង គឺពិតណាស់ពាក់ព័ន្ធនឹងការស្តារស្ថិរភាព និងកំណើនសេដ្ឋកិច្ច»។

លោកបានបន្ថែមថា ការពិភាក្សានឹងធ្វើឡើងនៅក្នុងរង្វង់ក្រុមប្រទេស G7 និងទ្វេភាគីជាមួយរដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent អំពីផលប៉ះពាល់នៃអត្រាពន្ធថ្មីរបស់ប្រធានាធិបតី លោក Donald Trump លើដៃគូពាណិជ្ជកម្ម ហើយថា វានឹងតែងតែមានភាពតានតឹង ជុំវិញបញ្ហាបែបនេះ៕