បេសកជនរងសហរដ្ឋអាមេរិកប្រចាំតំបន់មជ្ឈិមបូព៌ា លោកស្រី Morgan Ortagus បាននិយាយកាលពីថ្ងៃអង្គារថា ប្រទេសលីបង់ ត្រូវបន្តធ្វើការច្រើនទៀត ដើម្បីឲ្យក្រុមហេសបូឡារំសាយអាវុធ បន្ទាប់ពីសង្គ្រាមរវាងក្រុមគាំទ្រដោយអ៊ីរ៉ង់ និងអ៊ីស្រាអែល។  

ជាផ្នែកនៃកិច្ចព្រមព្រៀងមួយ បានព្រមព្រៀងគ្នា ដើម្បីបញ្ចប់ការប្រយុទ្ធគ្នារយៈពេល ១៤ខែ កាលពីខែវិច្ឆិកា ឆ្នាំមុន ក្រុមហេសបូឡា ត្រូវដកអ្នកប្រយុទ្ធរបស់ខ្លួន នៅភាគខាងជើងនៃទន្លេ Litani របស់ប្រទេសលីបង់ ខណៈដែលអ៊ីស្រាអែល ត្រូវដកកងកម្លាំងរបស់ខ្លួនទាំងអស់ ចេញពីលីបង់ភាគខាងត្បូង។

កងទ័ពលីបង់ បាននិងកំពុងដាក់ពង្រាយនៅក្នុងតំបន់ ខណៈកម្លាំងអ៊ីស្រាអែល បានដកខ្លួនចេញ និងបាននិងកំពុងរុះរើហេដ្ឋារចនាសម្ព័ន្ធហេសបូឡា នៅទីនោះ។

កងរក្សាសន្តិភាពរបស់អង្គការសហប្រជាជាតិ ក៏មានវត្តមាននៅក្នុងតំបន់នេះ និងដើរតួនាទី ក្នុងការត្រួតពិនិត្យបទឈប់បាញ់។

លោកស្រី Ortagus បាននិយាយនៅឯវេទិកាសេដ្ឋកិច្ចនៅប្រទេសកាតា(Qatar Economic Forum) ដោយសំដៅលើកិច្ចខិតខំប្រឹងប្រែង ដើម្បីដកហូតអាវុធទាំងអស់ពីក្រុមហេសបូឡា។

លោកស្រី បានបន្ថែមថា៖«ទោះជាយ៉ាងណា មានកិច្ចការជាច្រើនទៀត ដែលត្រូវបន្តធ្វើ»។

លោកស្រី Ortagus បាននិយាយក្នុងសន្និសីទនៅប្រទេសកាតា ដោយអំពាវនាវឲ្យអ្នកនយោបាយលីបង់ «ធ្វើការសម្រេចចិត្ត»ថា៖«យើងនៅក្នុងសហរដ្ឋអាមេរិក បានអំពាវនាវឲ្យមានការរំសាយអាវុធទាំងស្រុង របស់ក្រុមហេសបូឡា។ ដូច្នេះ នេះមិនមែននិយាយតែអំពីភាគខាងត្បូងនៃទន្លេLitani នោះទេ គឺនិយាយនៅក្នុងប្រទេសទាំងមូល»។