ក្រសួងសុខាភិបាលលីបង់ បាននិយាយថា ការវាយប្រហាររបស់អ៊ីស្រាអែលកាលពីថ្ងៃអង្គារ បានបណ្តាល ឲ្យមនុស្ស ៩នាក់ រងរបួស នៅភាគខាងត្បូងប្រទេសនេះ ជាការវាយប្រហារចុងក្រោយបំផុត បើទោះជាមានបទឈប់បាញ់រវាងអ៊ីស្រាអែល និងក្រុមសកម្មប្រយុទ្ធហេសបូឡាក៏ដោយ។

តាមសេចក្តីរាយការណ៍ ការវាយប្រហារចុងក្រោយ ដែលយោធាអ៊ីស្រាអែល មិនបានធ្វើអត្ថាធិប្បាយភ្លាមៗនោះ បានកើតឡើងមួយថ្ងៃបន្ទាប់ពីអ៊ីស្រាអែល បាននិយាយថា ខ្លួនបានសម្លាប់សមាជិកនៃកងកម្លាំងសម្រាំង Radwan របស់ក្រុមហេសបូឡា នៅក្នុងតំបន់ព្រំដែននៃទីក្រុង Hula។

ក្រសួងសុខាភិបាលលីបង់កាលពីថ្ងៃអង្គារ បាននិយាយថា៖«យានដ្រូនរបស់អ៊ីស្រាអែលដែលជាសត្រូវនេះ» បានត្រូវចំម៉ូតូមួយគ្រឿង នៅក្នុងតំបន់ឆ្នេរក្រុង Tyre។ 

ក្រសួងបាននិយាយថា មនុស្ស ៩នាក់ បានរងរបួស នៅក្នុងការវាយប្រហារនេះ ក្នុងនោះ ៣នាក់ ស្ថិតក្នុង «ស្ថានភាពធ្ងន់ធ្ងរ» ដោយបន្ថែមថា កុមារពីរនាក់ គឺស្ថិតក្នុងចំណោមជនរងគ្រោះ។ 

អ៊ីស្រាអែលបានបន្តបើកការវាយប្រហារលើប្រទេសជិតខាងភាគខាងជើងរបស់ខ្លួន បើទោះបីជាបទឈប់បាញ់កាលពីខែវិច្ឆិកា ដែលព្យាយាមបញ្ឈប់អរិភាពជាងមួយឆ្នាំ ជាមួយក្រុមហេសបូឡា ដែលគាំទ្រដោយអ៊ីរ៉ង់ រួមទាំងសង្គ្រាមពេញបន្ទុករយៈពេលពីរខែ។ 

នៅក្រោមលក្ខខណ្ឌនៃកិច្ចព្រមព្រៀងបទឈប់បាញ់ មានតែកងរក្សាសន្តិភាពរបស់អង្គការសហប្រជាជាតិ និងកងទ័ពលីបង់ប៉ុណ្ណោះ ដែលគួរតែត្រូវបានដាក់ពង្រាយនៅភាគខាងត្បូងប្រទេសលីបង់ ទោះបីជាអ៊ីស្រាអែល បានរក្សាកងកម្លាំងរបស់ខ្លួន នៅក្នុងតំបន់ចំនួន ៥ ដែលខ្លួនបានប្រកាសជាយុទ្ធសាស្ត្រក៏     ដោយ។ 

ប្រទេសលីបង់ បានអំពាវនាវដល់សហគមន៍អន្តរជាតិឲ្យដាក់សម្ពាធលើអ៊ីស្រាអែល ឲ្យបញ្ចប់ការវាយប្រហាររបស់ខ្លួន និងដកកងទ័ពចេញទាំងអស់។