សម្ព័ន្ធមូស្លីមពិភពលោកនៅថ្ងៃពុធនេះ បានស្វាគមន៍សេចក្តីថ្លែងការណ៍រួម ដែលចេញដោយចក្រភពអង់គ្លេស បារាំង និងកាណាដា ទាក់ទងនឹងសង្រ្គាមរបស់អ៊ីស្រាអែលលើតំបន់ហ្កាហ្សា និងតំបន់វេសបែង។

សេចក្តីថ្លែងការណ៍ បានព្រមានអំពីវិធានការជាក់ស្តែង រួមទាំងការដាក់ទណ្ឌកម្មជាគោលដៅ ប្រសិនបើរដ្ឋាភិបាលកាន់កាប់របស់អ៊ីស្រាអែល បរាជ័យក្នុងការបញ្ឈប់ប្រតិបត្តិការយោធារបស់ខ្លួន ក្នុងបញ្ឈប់ការពង្រីកការតាំងទីលំនៅ និងដកការរឹតបន្តឹងលើជំនួយមនុស្សធម៌។

លោកបណ្ឌិត Mohammed bin Abdulkarim Al-Issa អគ្គលេខាធិការនៃសម្ព័ន្ធមូស្លីមពិភពលោក ដែលជាប្រធានសមាគមអ្នកប្រាជ្ញមូស្លីម បានកោតសរសើរចំពោះជំហររួមគ្នានេះ។

នៅក្នុងសេចក្តីថ្លែងការណ៍មួយ លោក Al-Issa បានពណ៌នាសេចក្តីថ្លែងការណ៍នេះថា ជា«ជំហានដ៏សំខាន់ នៅក្នុងទិសដៅត្រឹមត្រូវសម្រាប់ប្រជាជនប៉ាឡេស្ទីន ដែលការរងទុក្ខ ត្រូវបានអូសបន្លាយ នៅក្រោមយន្តការសម្លាប់ និងការបំផ្លិចបំផ្លាញដោយរដ្ឋាភិបាលកាន់កាប់របស់អ៊ីស្រាអែល»។

លោកបានជំរុញសហគមន៍អន្តរជាតិឲ្យ បំពេញកាតព្វកិច្ចផ្លូវច្បាប់ និងសីលធម៌ ដោយបង្កើនសម្ពាធ ដើម្បីបញ្ចប់ការរំលោភបំពានដែលកំពុងបន្ត ហើយចាប់ជនល្មើសឲ្យទទួលខុសត្រូវ។