ស៊ូដង់ និយាយថា ប្រទេសអារ៉ាប់រួមគឺជាអ្នកឈរនៅពីក្រោយការវាយប្រហារលើទីក្រុង Port Sudan ក្នុងខែនេះ ដោយពួកគេបានចោទប្រកាន់រដ្ឋឈូងមួយនេះជាលើកដំបូងពីការធ្វើអន្តរាគមន៍យោធាដោយផ្ទាល់នៅក្នុងសង្រ្គាមរវាងកងទ័ពស៊ូដង់ និងកងកម្លាំងគាំទ្ររហ័ស(RSF) ។

អារ៉ាប់រួមបានច្រានចោលការចោទប្រកាន់មួយនេះនៅក្នុងសេចក្តីថ្លែងការណ៍ ហើយពួកគេនិយាយថា ពួកគេសូមធ្វើការថ្កោលទោសការវាយប្រហារខាងលើ ។

មន្រ្តីអារ៉ាប់រួមមួយរូបនិយាយថា វាគឺជារឿងគួរឲ្យសោកស្តាយជាពន់ពេកកាលដែលអាជ្ញាធរទីក្រុង Port Sudan បន្តប្រព្រឹត្តអំពើហិង្សាលើពលរដ្ឋខ្លួនឯងបែបនេះ ពួកគេបែរជាមិនស្វែងរកការស្តីបន្ទោសពីទំនួលខុសត្រូវផ្ទាល់ខ្លួនរបស់ពួកគេសម្រាប់ជម្លោះផ្ទៃក្នុងស៊ូដង់ តែបែរជាទម្លាក់ការចោតប្រកាន់គ្មានមូលដ្ឋានទៅលើអ្នកដទៃបែបនេះទៅវិញ ។

ថ្លែងនៅបុរីញូវយ៉កកាលពីថ្ងៃចន្ទ ឯកអគ្គរដ្ឋទូតស៊ូដង់ប្រចាំនៅអង្គការសហប្រជាជាតិ(UN) លោក Al-Harith Idriss Al-Harith Mohamed បានចោទប្រកាន់ថា ការវាយប្រហារកាលពីថ្ងៃទី ៤ ខែឧសភា លើរដ្ឋធានី Port Sudan ធ្វើឡើងដោយយន្តហោះចម្បាំង MQ-9 ឬ MQ-9B ហើយនិងយានដ្រូន អត្តឃាត Kamikaze បាញ់ចេញពីមូលដ្ឋានទ័ពនៅអារ៉ាប់រ៉ួមស្ថិតក្នុងសមុទ្រក្រហម ដោយមានជំនួយពីនាវាអារ៉ាប់រួម ។

លោក Mohamed បានចោទប្រកាន់ថា ការវាយប្រហារលើទីក្រុង Port Sudan គឺជាការសងសឹកមួយសម្រាប់ការវាយប្រហាររបស់កងទ័ពកាលពីរយៈពេល ១ថ្ងៃមុន លើយន្តហោះចម្បាំងអារ៉ាប់រួម នៅទីក្រុង Nyala គ្រប់គ្រងដោយកងកម្លាំង RSF ដែលលោកនិយាយថា បានសម្លាប់ជនបរទេស ១៣នាក់ រួមទាំងពលរដ្ឋអារ៉ាប់រួមផងដែរ ។

សូមបញ្ជាក់ថា ស៊ូដង់បានកាត់ផ្តាច់ទំនាក់ទំនងការទូតជាមួយអារ៉ាប់រួមក្នុងខែនេះ ដោយពួកគេនិយាយថា មហាអំណាចឈូងសមុទ្រមួយនេះ ជួយដល់កងកម្លាំង RSF ជាមួយនឹងការផ្គត់ផ្គង់អាវុធយុទ្ធភណ្ឌទំនើបនៅក្នុងជម្លោះខ្ទេចខ្ទាំ ដែលបានផ្ទុះឡើងកាលពីខែមេសា ឆ្នាំ ២០២៣ បន្ទាប់ពីការខ្វែងគំនិតគ្នាលើការរួមបញ្ចូលគ្នាកងកម្លាំងទាំង ២ ៕