រដ្ឋមន្ត្រីការបរទេសអារ៉ាប់រួមលោក Sheikh Abdullah bin Zayed បានសន្ទនាតាមទូរស័ព្ទជាមួយសមភាគីអ៊ីស្រាអែល ក្នុងអំឡុងពេលដែលកិច្ចព្រមព្រៀងមួយ ត្រូវបានឈានដល់ ដើម្បីអនុញ្ញាតឲ្យផ្តល់ «ជំនួយមនុស្សធម៌ជាបន្ទាន់» ទៅកាន់តំបន់ហ្កាហ្សាស្ទ្រីបដែលត្រូវបានឡោមព័ទ្ធ។

អង្គការគ្រូពេទ្យគ្មានព្រំដែន [Médecins Sans Frontières (MSF)] បាននិយាយនៅថ្ងៃពុធនេះថា បរិមាណនៃជំនួយដែលអ៊ីស្រាអែលអនុញ្ញាតឲ្យឆ្លងកាត់ គឺមិនគ្រប់គ្រាន់ទេ ហើយគ្រាន់តែជាល្បិចកលដើម្បីធ្វើពុតថា ការឡោមព័ទ្ធនេះ បានបញ្ចប់ប៉ុណ្ណោះ។

ទីភ្នាក់ងារសារព័ត៌មានរដ្ឋ WAM របស់ប្រទេសនេះ បានរាយការណ៍នៅថ្ងៃពុធនេះថា លោកSheikh Abdullah bin Zayed បានសន្ទនាតាមទូរស័ព្ទជាមួយរដ្ឋមន្ត្រីក្រសួងការបរទេសអ៊ីស្រាអែល លោក Gideon Sa'ar ដែលនាំឲ្យមានកិច្ចព្រមព្រៀងមួយ ដើម្បីអនុញ្ញាតឲ្យផ្តល់ជំនួយមនុស្សធម៌ជាបន្ទាន់ ពីប្រទេសអារ៉ាប់រួម។

សារព័ត៌មាន បានបន្ថែមថា៖«ជំនួយនឹងដោះស្រាយតម្រូវការស្បៀងអាហាររបស់ជនស៊ីវិលប្រហែល ១៥.000នាក់ នៅក្នុងតំបន់ហ្កាហ្សាស្ទ្រីប ក្នុងដំណាក់កាលដំបូង»។

គំនិតផ្តួចផ្តើមនេះ ក៏នឹងផ្តល់ «ការផ្គត់ផ្គង់សំខាន់ៗ ដើម្បីគាំទ្រដល់ប្រតិបត្តិការហាងនំប៉័ង ក៏ដូចជាសម្ភារៈសំខាន់ៗសម្រាប់ការថែទាំទារក ខណៈពេលដែលធានានូវការផ្គត់ផ្គង់ជាបន្តបន្ទាប់ ដើម្បីបំពេញតម្រូវការដែលកំពុងបន្តរបស់ជនស៊ីវិល»។