នគរបាលអាល្លឺម៉ង់នៅថ្ងៃពុធនេះ បានចាប់ខ្លួនក្មេងជំទង់ ៥នាក់ ដែលត្រូវបានចោទប្រកាន់ថា មានជាប់ពាក់ព័ន្ធជាមួយក្រុមស្តាំនិយមជ្រុល ហៅខ្លួនឯងថា «រលកការពារចុងក្រោយ» ដែលត្រូវបានចោទប្រកាន់ថា មានគោលបំណងធ្វើឲ្យប្រព័ន្ធប្រជាធិបតេយ្យរបស់ប្រទេសមានអស្ថិរភាព ដោយធ្វើការវាយប្រហារលើជនអន្តោប្រវេសន៍ និងគូប្រជែងនយោបាយ។

រដ្ឋអាជ្ញាសហព័ន្ធ បាននិយាយនៅក្នុងសេចក្តីថ្លែងការណ៍មួយថា ការចាប់ខ្លួនទាំងព្រឹកព្រលឹម នៅក្នុងតំបន់ផ្សេងៗនៃប្រទេសអាល្លឺម៉ង់ ត្រូវបានអមដោយការស្វែងរកនៅផ្ទះចំនួន ១៣កន្លែង។

៤នាក់ក្នុងចំណោមអ្នកដែលត្រូវបានចាប់ខ្លួន ត្រូវបានកំណត់អត្តសញ្ញាណត្រឹមតែឈ្មោះ Benjamin H., Ben-Maxim H., Lenny M. និង Jason R. ស្របតាមច្បាប់ឯកជនភាពរបស់អាល្លឺម៉ង់ ត្រូវបានសង្ស័យថា ជាសមាជិកនៅក្នុងអង្គការភេរវកម្មក្នុងស្រុក។ ទី៥គឺ Jerome M. ត្រូវបានគេចោទប្រកាន់ថា បានគាំទ្រក្រុមនេះ។ ចំណែក ២នាក់ក្នុងចំណោមអ្នកដែលត្រូវបានចាប់ខ្លួន ក៏ត្រូវបានចោទប្រកាន់ពីបទប៉ុនប៉ងមនុស្សឃាត និងមានស្ថានទម្ងន់ទោសផងដែរ។ ពួកគេទាំងអស់ មានអាយុចន្លោះពី ១៤ ទៅ ១៨ឆ្នាំ។

រដ្ឋអាជ្ញាបាននិយាយថា ពួកគេក៏កំពុងស៊ើបអង្កេតមនុស្សបីនាក់ផ្សេងទៀត ដែលមានអាយុពី ១៨ ទៅ ២១ ឆ្នាំដែលកំពុងជាប់ឃុំរួចហើយ។ ជនសង្ស័យទាំងអស់ គឺជាជនជាតិអាល្លឺម៉ង់។