ទូកក្ដោង៖ ​កីឡាករ​កម្ពុជា ផល សិលា បាន​រក្សា​ភាព​ខ្លាំង​របស់​ខ្លួនដោយ​គ្រង​ចំណាត់ថ្នាក់​លេខ​១ រយៈពេល ៣​ថ្ងៃ​ជាប់​គ្នាលើ​វិញ្ញាសា RS:One ក្នុងការ​ប្រកួត​កីឡា​ទូកក្ដោង​ជ្រើសរើស​ជើងឯក​អាស៊ីអាគ្នេយ៍ឆ្នាំ​២០២១ នៅ​ខេត្ត​ព្រះសីហនុ។ ព្រឹត្តិការណ៍​ប្រចាំ​តំបន់​នេះបានបញ្ចប់​ការប្រកួត ៣​ថ្ងៃ​មកហើយគិត​ត្រឹម​ល្ងាច​ថ្ងៃទី​១៥ ខែធ្នូ ឆ្នាំ​២០២១ នេះ។​

​វិញ្ញាសា​  RS:One  មាន​បេក្ខភាព​ប្រកួតប្រជែង ៥​រូបក្នុងនោះ​មាន​កីឡាករ​កម្ពុជា ៣​រូប និង​សិង្ហ​បុរី ២​រូប ខណៈ​ប្រកួត ២​ថ្ងៃ​ដំបូងគេ​ឃើញ​កីឡាករ​កម្ពុជាបាន​ឈរ​លេខ​១ លេខ​២ និង​លេខ​៣ តែ​លទ្ធផល​ថ្ងៃទី​៣ ម្សិលមិញមានការ​ប្រែប្រួល​បន្ដិចដោយ​កីឡាករ ផល សិលា បន្ដ​ឈរ​លេខ​១ ខណៈ​មិត្ត​រួម​ជាតិ សែម ប្រុស​ពៅ បន្ដ​ឈរ​លេខ​៣ តែ​កីឡាករ ហេន សុ​ភី បាន​ធ្លាក់​ទៅ​ឈរ​លេខ​៤ ស្របពេល​កីឡាករ​សិង្ហ​បុរី Lemmy Tei Kay Chee ឡើង​មកឈរ​លេខ​២ វិញ។​ ​ចំពោះ​លទ្ធផល​ការប្រកួត​ថ្ងៃទី​៣ ចំនួន ៤​វិញ្ញាសា​ទៀតរួមមាន​៖ ១-​វិញ្ញាសា​ ILCA 7 កីឡាករ​កម្ពុជា ញូ​វ ចាន់ រក្សា​ចំណាត់ថ្នាក់​លេខ​២ បណ្ដោះអាសន្នជា​លើក​ទី​១ ខណៈ​កីឡាករ​ម៉ាឡេស៊ីបន្ដ​ឈរ​លេខ​១ គ្រា​ដែលកីឡាករ ឡុ​ច ដា​រ៉ុង បន្ដ​ឈរ​លេខ​៣។​ ២-​វិញ្ញាសា​ ILCA 6 កីឡាករ​កម្ពុជា ២​រូប​បន្ដ​ឈរ​លេខ ៤ និង​លេខ ៥ ក្នុងចំណោម​កីឡាករ ៥​រូប ខណៈ​កីឡាករ​សិង្ហ​បុរីបន្ដ​ឈរ​លេខ​១ លេខ​២ និង​លេខ​៣។​ ៣-​វិញ្ញាសា​ Techno 293 កីឡាករ​កម្ពុជា កែវ ភា​រុណ បន្ដ​ឈរ​លេខ​២ បណ្ដោះអាសន្នតាម​ពីក្រោយ​កីឡាករ​សិង្ហ​បុរី David NG Tiong Gee។ វិញ្ញាសា​នេះកម្ពុជា​បញ្ជូន​កីឡាករ ៥​រូប​ចូលរួមក្នុងចំណោម​កីឡាករ​សរុប ៨​នាក់។​

៤-​វិញ្ញាសា ILCA 4 កីឡាករ​សិង្ហ​បុរីឈរ​លេខ​១ និង​លេខ​៣ ខណៈ​កីឡាករ​ម៉ាឡេស៊ីឡើង​មកឈរ​លេខ​២ បណ្ដោះអាសន្ន។ ប៉ុន្ដែ​វិញ្ញាសា​នេះកម្ពុជា​ពុំបាន​បញ្ជូន​កីឡាករ​ចូលរួម​ប្រកួត​នោះទេ។​ ​សូមបញ្ជាក់ថា ព្រឹត្តិការណ៍​នេះមាន​អត្ត​ព​លិ​ក ២៧​នាក់​មកពី ៣​ប្រទេស​ចូលរួម ដែល​ប្រកួត​លើ ៥​វិញ្ញាសា ហើយ​វិញ្ញាសា​នីមួយៗកីឡាករ​ម្នាក់ៗ​ត្រូវធ្វើ​ការប្រកួត​យ៉ាងហោច ១៦​ជុំដើម្បី​កំណត់​កីឡាករ​ជ័យលាភី ខណៈ​រយៈពេល ២​ថ្ងៃ​កន្លងមកទើប​ប្រកួត​បាន ៧​ជុំ​ប៉ុណ្ណោះ។ តាម​គម្រោងការ​ប្រកួត​កីឡា​ទូកក្ដោង​ជើងឯក​អាស៊ាន​នេះនឹង​បញ្ចប់​នា​ថ្ងៃទី​១៧ ខែធ្នូ​ស្អែក​នេះ៕

​អត្ថបទ៖ លី ឈុន​ឡា