នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយក្នុងសន្និសីទសារព័ត៌មានលើកដំបូងចាប់តាំងពីខែធ្នូ ថាដែនដីហ្កាហ្សាទាំងមូលនឹងធ្លាក់ក្រោមការគ្រប់គ្រងរបស់យោធាអ៊ីស្រាអែល នៅទីបញ្ចប់នៃការវាយលុកចុងក្រោយ ដោយកំណត់លក្ខខណ្ឌអតិបរមាសម្រាប់ការបញ្ចប់សង្រ្គាមដ៏សាហាវនៅលើទឹកដីប៉ាឡេស្ទីនត្រូវបានឡោមព័ទ្ធមួយនេះ ។

ប្រជាជនប៉ាឡេស្ទីនរាប់រយនាក់ត្រូវបានសម្លាប់ក្នុងការទម្លាក់គ្រាប់បែករបស់អ៊ីស្រាអែលឥតឈប់ឈរនៅទូទាំងតំបន់ហ្កាហ្សាក្នុងរយៈពេលប៉ុន្មានថ្ងៃថ្មីៗនេះ យ៉ាងហោចណាស់៩៣ នាក់ចាប់តាំងពីព្រឹកព្រលឹមថ្ងៃពុធសប្ដាហ៍នេះ ស្របពេលគ្របដណ្ដប់ដោយភាពអត់ឃ្លាន ហើយមានតែរថយន្តជំនួយតិចតួចប៉ុណ្ណោះដែលត្រូវបានអនុញ្ញាតឲ្យចូល ។

លោក Netanyahu ក៏បាននិយាយកាលពីថ្ងៃពុធដែរថា ប្រសិនបើមានឱកាសសម្រាប់បទឈប់បាញ់បណ្តោះអាសន្ន និងកិច្ចព្រមព្រៀងដោះដូរចំណាប់ខ្មាំង អ៊ីស្រាអែលនឹងបើកចំហទទួលយក ។  

មេដឹកនាំអ៊ីស្រាអែលបានដាក់លក្ខខណ្ឌសម្រាប់ការបញ្ចប់សង្រ្គាម ដូចជាការដោះលែងចំណាប់ខ្មាំងទាំងអស់ ការរំសាយអាវុធរបស់ក្រុមហាម៉ាស ការនិរទេសមេដឹកនាំរបស់ក្រុមនេះ និងលទ្ធភាពនៃការអនុវត្តផែនការដែលបានគូសបញ្ជាក់ដោយប្រធានាធិបតីសហរដ្ឋអាមេរិកលោក Donald Trumpកាលពីខែកុម្ភៈ ដែលនឹងបណ្តេញជនជាតិប៉ាឡេស្ទីនចេញពីហ្កាហ្សា។  

លោក Trump បាននិយាយថា សហរដ្ឋអាមេរិកគួរតែគ្រប់គ្រងតំបន់ហ្កាហ្សា និងកែលម្អដែនដីនេះទៅជារមណីយដ្ឋានលំហែកាយប្រណីតនៅមជ្ឈិមបូព៌ា។ នេះជាលើកទីមួយហើយ ដែលផែនការរបស់លោក Trump ត្រូវបានលោក Netanyahu លើកឡើងថា ជាលក្ខខណ្ឌមួយក្នុងចំណោមលក្ខខណ្ឌជាច្រើនក្នុងការបញ្ឈប់ការប្រយុទ្ធគ្នា។ ប្រទេស និងក្រុមសិទ្ធិមនុស្សជាច្រើនបានហៅផែនការនេះថាជាការបោសសម្អាតជនជាតិភាគតិច៕