ប្រទេសអ៊ុយក្រែន និងរុស្ស៊ី អាចនឹងបើកការចរចាកម្រិតបច្ចេកទេសនៅបុរីវ៉ាទីកង់ នៅសប្តាហ៍ក្រោយ។ ប្រធានាធិបតីរបស់ប្រទេសហ្វាំងឡង់ លោក Alexander Stubb បាននិយាយទៅកាន់ប្រព័ន្ធផ្សព្វផ្សាយសាធារណៈរបស់ប្រទេស អំពីលទ្ធភាពនេះ កាលពីថ្ងៃពុធ។

ការនិយាយលើកឡើងរបស់លោក កើតឡើងបន្ទាប់ពីលោកបានសន្ទនាតាមទូរស័ព្ទជាមួយប្រធានាធិបតីអ៊ុយក្រែន លោក Volodymyr Zelenskyy និងអ្នកផ្សេងទៀត បន្ទាប់ពីការចរចាកម្រិតខ្ពស់កាលពីសប្តាហ៍មុន រវាងអ៊ុយក្រែននិងរុស្ស៊ី នៅក្នុងប្រទេសទួរគី។ លោក Stubb តាមសេចក្តីរាយការណ៍បាននិយាយថា សហរដ្ឋអាមេរិក មិនបញ្ឈប់ពីតួនាទីរបស់ខ្លួនជាអ្នកសម្របសម្រួលនោះទេ ហើយសហភាពអឺរ៉ុបក៏កំពុងតែចូលរួមកាន់តែសកម្មសនៅក្នុងក្របខ័ណ្ឌបទឈប់បាញ់។

មន្ត្រីជាន់ខ្ពស់មកពីប្រទេសអ៊ុយក្រែន និងរុស្ស៊ី បានជួបចរចាដោយផ្ទាល់លើកដំបូងក្នុងរយៈពេលបីឆ្នាំមកនេះ កាលពីថ្ងៃសុក្រសប្តាហ៍មុន។ ភាគីតាំងពីរ បានធ្វើឲ្យមានវឌ្ឍនភាពតិចតួចដើម្បីឈានដល់កិច្ចព្រមព្រៀងបទឈប់បាញ់ ប៉ុន្តែបានឯកភាពគ្នាចំពោះការដោះដូរឈ្លើយសឹកទ្រង់ទ្រាយធំ។

តាមសេចក្តីរាយការណ៍ សម្តេចប៉ាប លីអូ ទី១៤ នឹងរៀបចំទទួលកិច្ចចរចាសន្តិភាពរវាងប្រទេសទាំងពីរនៅបុរីវ៉ាទីកង់។ សម្តេចប៉ាបថ្មី កំពុងអំពាវនាវឱ្យមានការដោះស្រាយជម្លោះដោយសន្តិវិធីនៅក្នុងតំបន់នានា។

ប្រធានាធិបតីរុស្ស៊ីលោក វ្ល៉ាឌីមៀ ពូទីន បានផ្ញើសារអបអរសាទរចំពោះសម្តេចប៉ាប បន្ទាប់ពីការជាប់ឆ្នោតរបស់ទ្រង់កាលពីថ្ងៃទី ៨ ខែឧសភា ហើយលោក Zelenskyy ក៏បានជួបព្រះអង្គបន្ទាប់ពីពិធីឡើងកាន់តំណែងរបស់ទ្រង់។