ក្រសួងការពារជាតិប្រទេសកូរ៉េខាងត្បូង បាននិយាយថា ប្រទេសកូរ៉េខាងជើង បានបាញ់មីស៊ីលស៊ីបគោលដៅមិនស្គាល់អត្តសញ្ញាណជាច្រើនគ្រាប់ នៅព្រឹកថ្ងៃព្រហស្បតិ៍ ទី២២ ខែឧសភានេះ។

ក្រសួងបាននិយាយបន្ថែមថា អាជ្ញាធរចារកម្មទីក្រុងសេអ៊ូល និងទីក្រុងវ៉ាស៊ីនតោន កំពុងវិភាគពីព័ត៌មានលម្អិតនេះ។

ការបាញ់នេះ បានកើតឡើងប៉ុន្មានម៉ោងបន្ទាប់ពីប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA បានរាយការណ៍ថា គ្រោះថ្នាក់ធ្ងន់ធ្ងរមួយបានកើតឡើងកាលពីថ្ងៃពុធ ទី២១ ខែឧសភា ក្នុងអំឡុងការចាប់ផ្តើមដាក់ឲ្យដំណើរការនាវាចម្បាំងថ្មីរបស់កូរ៉េខាងជើង ខណៈលោក Kim Jong Un ក៏កំពុងតែចូលរួមក្នុងព្រឹត្តិការណ៍នោះផងដែរ។

ប្រព័ន្ធផ្សព្វផ្សាយ KCNA បាននិយាយនៅថ្ងៃព្រហស្បតិ៍នេះថា លោក Kim ដែលបានឃើញការចាប់ផ្តើមដំណើរការនាវាចម្បាំងទម្ងន់៥ពាន់តោនដែលបរាជ័យ បានលើកឡើងពីឧបទ្ទវហេតុនេះថាបណ្តាលមកពី «ការធ្វេសប្រហែស» ដែលបានធ្វើឱ្យខូចកិត្តិយសដល់ប្រទេស ហើយបានបញ្ជាឱ្យជួសជុលនាវានេះ មុនពេលកិច្ចប្រជុំគណបក្សកាន់អំណាចដ៏សំខាន់មួយ នៅក្នុងខែមិថុនា។