ប្រជាជនប៉ាឡេស្ទីនជាច្រើន បានធ្វើដំណើរតាមដងផ្លូវនៅភាគខាងត្បូងតំបន់ហ្កាហ្សា រយៈពេល ៣ថ្ងៃមកហើយកាលពីថ្ងៃពុធ (២១ ឧសភា) ដើម្បីតវ៉ាប្រឆាំងនឹងក្រុមហាម៉ាស។ បាតុកររាប់រយនាក់ ត្រូវបានមើលឃើញនៅក្នុងវីដេអូបង្ហោះលើប្រព័ន្ធផ្សព្វផ្សាយសង្គម អំពាវនាវឱ្យបញ្ចប់សង្គ្រាម និងទាមទារឱ្យដកក្រុមប្រដាប់អាវុធនេះចេញពីតំបន់ហ្កាហ្សា ដោយស្រែកថា "ចេញទៅ! ហាម៉ាសចេញឱ្យអស់ទៅ!"។

ការនិយាយប្រឆាំងក្រុមហាម៉ាស អាចមានគ្រោះថ្នាក់ខ្លាំងណាស់នៅក្នុងតំបន់ហ្កាហ្សា ហើយការគំរាមកំហែងបានផ្សព្វផ្សាយនៅលើក្រុមផ្ញើសារ WhatsApp របស់អ្នកកាសែត កាលពីថ្ងៃអង្គារសប្ដាហ៍នេះ ដោយហាមប្រាមមិនឱ្យផ្សព្វផ្សាយ "ព័ត៌មានអវិជ្ជមានដែលអាចប៉ះពាល់ដល់សីលធម៌របស់ប្រជាជន"។

សកម្មជននិយាយថា យុវជនប៉ាឡេស្ទីនបានចាប់ផ្តើមការតវ៉ាតាំងតែពីថ្ងៃចន្ទ ហើយត្រូវបានចូលរួមដោយអ្នកផ្សេងទៀត ដែលនៅតាមផ្លូវទៅយកអាហារពីផ្ទះបាយសហគមន៍។ វីដេអូពីតវ៉ានៅក្រុង Khan Younis បង្ហាញក្រុមយុវជនដែលរិះគន់ក្រុមហាម៉ាសថា "លក់ឈាមរបស់អ្នកស្រុកក្នុងតម្លៃត្រឹមមួយដុល្លារ ក្នុងដៃយុទ្ធជន" ដោយបន្តថា "ប្រយ័ត្នប្រជាជនហ្កាហ្សា ជីកផ្នូររបស់អ្នក” ដោយសំដៅលើក្រុមសកម្មប្រយុទ្ធមួយនេះ។

ក្នុងប៉ុន្មានខែថ្មីៗ ការតវ៉ាប្រឆាំងនឹងក្រុមហាម៉ាស បាននឹងកំពុងកើនឡើងនៅភាគខាងជើងហ្កាហ្សា ប៉ុន្តែសកម្មជននិយាយថា វត្តមានរបស់ក្រុមនេះនៅភាគខាងត្បូងនៅតែមានភាពរឹងមាំ ហើយហាម៉ាស បានបង្ក្រាបដោយជោគជ័យនូវការមិនពេញចិត្តជាសាធារណៈរហូតមកដល់បច្ចុប្បន្ន៕