ប្រធានអង្គការសុខភាពពិភពលោក (WHO) លោក Tedros Adhanom Ghebreyesus បានព្រមានថា ប្រតិបត្តិការជើងគោកអ៊ីស្រាអែល ដែលកាន់តែខ្លាំងក្លាឡើង និងបញ្ជាជម្លៀសថ្មី កំពុងបំផ្លាញប្រព័ន្ធសុខាភិបាលរបស់ដែនដីហ្កាហ្សា ឱ្យកាន់តែអាក្រក់លើសពីចំណុចទប់ទល់លែងបាន។

លោក Tedros បាននិយាយថា មន្ទីរពេទ្យឥណ្ឌូនេស៊ីឈ្មោះ Kamal Adwan និង Al-Awda នៅភាគខាងជើងនៃទីក្រុង Beit Lahia និង Jabalia ស្ថិតនៅក្នុងតំបន់ជម្លៀសមួយដែលបានប្រកាសកាលពីថ្ងៃអង្គារសប្ដាហ៍នេះ ហើយមន្ទីរពេទ្យពីរផ្សេងទៀតស្ថិតនៅក្នុងចម្ងាយ ១គីឡូម៉ែត្រ ពីទីនោះដែរ។

លោកបន្តថា មន្ទីរពេទ្យ Kamal Adwan មិនអាចដំណើរការបានទេដោយសារអរិភាពនៅក្បែរនោះ ហើយមន្ទីរពេទ្យឥណ្ឌូនេស៊ីមួយនេះក៏មិនអាចចូលទៅដល់បានដែរ ដោយសារវត្តមានរបស់កងកម្លាំងអ៊ីស្រាអែល នៅជុំវិញនោះ។ ចំណែកមន្ទីរពេទ្យ Al-Awda នៅតែដំណើរការ ប៉ុន្តែនាយករបស់មណ្ឌលសុខភាពនេះបានប្រាប់សារព័ត៌មាន BBC កាលពីថ្ងៃពុធថា មន្ទីរពេទ្យត្រូវបាន "ស្ថិតនៅក្រោមការឡោមព័ទ្ធទាំងស្រុង"។

កងកម្លាំងការពារអ៊ីស្រាអែល (IDF) បានប្រាប់ BBC ថា ខ្លួនកំពុងប្រតិបត្តិការនៅតំបន់នោះប្រឆាំងគោលដៅភេរវកម្ម ប៉ុន្តែបញ្ជាក់ថា ខ្លួនមិនបានដឹងពីការឡោមព័ទ្ធណាមួយលើមន្ទីរពេទ្យឡើយ។ អង្គការគ្រូពេទ្យគ្មានព្រំដែន (MSF) ក៏បាននិយាយផងដែរថា យ៉ាងហោចណាស់ទីតាំងពេទ្យចំនួន ២០កន្លែង នៅទូទាំងតំបន់ហ្កាហ្សា ត្រូវខូចខាត ឬត្រូវបង្ខំឱ្យផ្អាកដំណើរការក្នុងសប្តាហ៍កន្លងមក ដោយសារប្រតិបត្តិការជើងគោក ការវាយប្រហារតាមអាកាស និងបញ្ជាជម្លៀសខ្លួន៕