គុនខ្មែរ៖ ឯកឧត្តម ហេង សុខឃន អគ្គលេខាធិការសហព័ន្ធកីឡាប្រដាល់គុនខ្មែរបានបញ្ជាក់ថា បច្ចុប្បន្នសហព័ន្ធបាននឹងកំពុងយកចិត្តទុកដាក់ក្នុងការពង្រឹងការប្រមូលផ្ដុំក្រុមជម្រើសជាតិ រហូតធ្វើឲ្យមានមតិមួយចំនួនមានការងឿឆ្ងល់ តើមូលហេតុអ្វីបានមួយរយៈចុងក្រោយនេះ មិនសូវឃើញកីឡាករជួរមុខជាច្រើនរូបឡើងប្រកួតតាមសង្វៀននានា។
អគ្គលេខាធិការសហព័ន្ធដដែលបានបញ្ជាក់ថា ដោយគោរពតាមគោលការណ៍របស់ក្រសួងអប់រំ យុវជន និងកីឡា សហព័ន្ធបានកែទម្រង់លើការប្រមូលផ្ដុំក្រុមជម្រើសជាតិដើម្បីពង្រឹងសមត្ថភាពកីឡាករ និងបញ្ចៀសនូវបញ្ហាគ្រោះថ្នាក់នានា ដោយក្នុងមួយសប្ដាហ៍ សហព័ន្ធអនុញ្ញាតឲ្យកីឡាករឡើងប្រកួតតាមសង្វៀនតែម្ដងប៉ុណ្ណោះ។ ការធ្វើបែបនេះបានធ្វើឲ្យកីឡាករកំពុងតែរីកចម្រើនគួរឲ្យកត់សម្គាល់ ដើម្បីត្រៀមការប្រកួតកីឡាស៊ីហ្គេមនាពេលខាងមុខ។ សូមបញ្ជាក់ថា ក្រុមជម្រើសជាតិកីឡាប្រដាល់គុនខ្មែរ បច្ចុប្បន្នកំពុងប្រមូលផ្ដុំហ្វឹកហាត់លក្ខណៈបិទខ្ទប់នៅកីឡដ្ឋានកងយោធពលខេមរភូមិន្ទ ដោយក្រសួងអប់រំបានអនុញ្ញាតឲ្យប្រមូលផ្ដុំកីឡាករចំនួន ១៥រូបដើម្បីត្រៀមការប្រកួតកីឡាស៊ីហ្គេមឆ្នាំ២០២១ នៅវៀតណាម ពិសេសត្រៀមការប្រកួតកីឡាស៊ីហ្គេមឆ្នាំ២០២៣ នៅកម្ពុជា៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
