ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានលើកឡើងនៅថ្ងៃនេះថា ក្រសួង-ស្ថាប័នចំនួន ៥០ភាគរយ បានរៀបចំរចនាសម័្ពន្ធក្រសួង-ស្ថាប័នឡើងវិញ។ នេះជាការសម្រេចបានក្នុងរយៈពេលបំពេញការងារពេញមួយឆ្នាំ លើការវិភាគមុខងារ និងរចនាសម្ព័ន្ធតាមក្រសួង-ស្ថាប័ន។ ការលើកឡើងនេះ ធ្វើឡើងក្នុងឱកាស ដែលក្រសួងមុខងារសាធារណៈ និងធនាគារពិភពលោក សហការរៀបចំសិក្ខាសាលាស្ដីពី ការលើកកម្ពស់ប្រសិទ្ធភាពនៃការផ្ដល់សេវាសាធារណៈ ផ្អែកលើការពិនិត្យឡើងវិញ និងវិភាគមុខងារ និងរចនាសម្ព័ន្ធ នៅថ្ងៃទី ២២ ខែឧសភា ឆ្នាំ ២០២៥។
ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈបានលើកឡើងថា ក្នុងការបំពេញការងាររយៈពេល ១ឆ្នាំមកនេះ ក្រសួង-ស្ថាប័ន បានបញ្ចប់ការពិនិត្យឡើងវិញ ការវិភាគមុខងារ និងរចនាសម័្ពន្ធក្រសួងស្ថាប័ន ក្នុងដំណាក់កាលទី ១។ ក្រសួង-ស្ថាប័ន ភាគច្រើន បានកំណត់ច្បាស់លាស់មុខងារមុខងារស្នូល មុខងាររងនៃមុខងារស្នូល តាមវិស័យរបស់ខ្លួន។ ផ្អែកលើមូលដ្ឋាននៃការកំណត់ច្បាស់លាស់នូវមុខងារស្នូល និងមុខងាររងនៃមុខងារស្នូលតាមវិស័យរបស់ក្រសួងស្ថាប័ន បច្ចុប្បន្ន មានក្រសួងស្ថាប័នចំនួន ៥០ភាគរយ បានរៀបចំរចនាសម័្ពន្ធក្រសួងស្ថាប័នឡើងវិញ តាមរយៈការរៀបចំសេចក្ដីព្រៀងអនុក្រឹត្យស្ដីពីការប្រព្រឹត្តិទៅរបស់ក្រសួង-ស្ថាប័ន។
ឯកឧត្តម ឧបនាយករដ្ឋមន្ត្រី បានលើកឡើងដែរថា ការងារកំណែទម្រង់រដ្ឋបាលសាធារណៈ ជាកិច្ចការទាំងអស់គ្នា ទោះបីជាក្រសួងមុខងារសាធារណៈ ត្រូវបានរាជរដ្ឋាភិបាល ប្រគល់ភារកិច្ច ដឹកនាំ និងសម្របសម្រួលការងារកំណែទម្រង់រដ្ឋបាលសាធារណៈក៏ដោយ។ ឯកឧត្តមបន្តថា ការងារនេះមិនអាចសម្រេចបានលទ្ធផលប្រសើរនោះទេ បើសិនគ្មានការចូលរួមពីគ្រប់ក្រសួង ស្ថាប័ន និងភាគីពាក់ព័ន្ធ។
ឯកឧត្តម ឧបនាយករដ្ឋមន្ត្រី លើកឡើងដែរថា ការងារវិភាគមុខងារ និងរចនាសម័្ពន្ធតាមក្រសួងស្ថាប័ននេះ ជាឱកាស មិនជាបន្ទុកនោះទេ។ ឯកឧត្តមបញ្ជាក់ថា គោលលដៅចុងក្រោយបង្អស់គឺដើម្បីបង្កើនភាពធន និងសមត្ថភាពប្រកួតប្រជែងរបស់កម្ពុជាទាំងមូលលើឆាកអន្តរជាតិ ក្នុងការការពារផលប្រយោជន៍របស់កម្ពុជា។
ក្នុងសិក្ខាសាលានេះដែរ ឯកឧត្តម ដេរីក យីប ឯកអគ្គរដ្ឋទូតអូស្ត្រាលីប្រចាំកម្ពុជា លើកឡើងដែរថា អូស្ត្រាលីមានការប្ដេជ្ញាក្នុងការជួយលើការវិភាគមុខងារ និងរចនាសម្ព័ន្ធ ដើម្បីឱ្យស្ថាប័ននីមួយៗ ធ្វើកំណែទម្រង់ និងយល់ពីភារកិច្ច ទទួលខុសត្រូវរបស់ខ្លួន។
គួរបញ្ជាក់ដែរថា សិក្ខាសាលាដែលធ្វើឡើងរួមគ្នារវាង ក្រសួងមុខងារសាធារណៈ និងធនាគារពិភពលោកនេះ គឺដើម្បីចែករំលែកនូវចំណេះដឹង ឧត្តមានុវត្តន៍អន្តរជាតិនៃការលើកកម្ពស់ ប្រសិទ្ធភាពនៃការផ្តល់សេវាសាធារណៈដល់ក្រសួងស្ថាប័ន ផ្អែកលើការពិនិត្យឡើងវិញ និងការវិភាគមុខងារ និងរចនាសម្ព័ន្ធ និងឆ្លុះបញ្ចាំងពីបទពិសោធក្នុងការវិភាគមុខងារ និងរចនាសម្ព័ន្ធរបស់ក្រសួង ស្ថាប័ន ពាក់ព័ន្ធនឹងការគ្រប់គ្រងធនធានមនុស្ស ថវិកា និងអភិក្រមការងារ ដើម្បីកំណត់នូវបញ្ហាប្រឈម និង ការមូលមតិគ្នាក្នុងការលើកកម្ពស់ប្រសិទ្ធភាពការផ្តល់សេវាសាធារណៈសំខាន់ៗ និងដាក់ចេញការអនុវត្ត សកម្មភាពគន្លឹះនានានៃការកែទម្រង់ ដើម្បីលើកកម្ពស់ប្រសិទ្ធភាពនៃការផ្តល់សេវាសាធារណៈ៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
